Korrupsion 8.000 €, Apeli i GJKKO: Avokatit Besart Logu i ndalohet ushtrimi i profesionit

Gjykata e Posaçme e Apelit për Korrupsionin dhe Krimin e Organizuar i hoqi përkohësisht të drejtën e ushtrimit të profesionit avokatit Besart Logu, i cili akuzohet për një korrupsion me 8 mijë euro, duke ia marrë një klienti të akuzuar për të ndikuar te prokurorët dhe gjyqtarët me qëllim lirimin e tij. 

Avokati Besart Logu qëndronte në masën “arrest shtëpie” me vendim të shkallës së parë të GJKKO, për veprën “ndikim i paligjshëm”, ndërsa kishte bërë ankimin. Kurse sot, shkalla e dytë njoftoi se ka vendosur tjetër masë ndaj tij, duke e ndryshuar nga arrest shtëpiak për shkak të rrethanave familjare, në ndalim të ushtrimit të profesionit.

“Me trup gjykues monokratik të përbërë nga gjyqtar Florjan Kalaja, sot më 29.09.2025, shpalli vendimin mbi çështjen penale nr. 68 akti, datë 22.09.2025 regjistrimi, mbi ankimin e personit nën hetim B.L., me objekt: “ankim ndaj vendimit dhe vendimit nr. 92, datë 11.09.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Marrjen në pyetje të të arrestuarit B.L.” dhe vendosi: Ndryshimin e Vendimit Nr. 92, datë 11.09.2025 të Gjykatës së Posaçme të Shkallës së Parë për Korrupsionin e Krimin e Organizuar. Caktimin ndaj B.L. të masës së sigurimit ndalues të parashikuar nga neni 243 i Kodit të Procedurës Penale, duke urdhëruar ndalimin e përkohshëm të ushtrimit të profesionit të avokatisë”, thuhet në vendimin e marrë nga Apeli i GJKKO-së.

Ndërkohë urdhërohet sekretaria gjyqësore që përmes një kopje të këtij vendimi të njoftohet Dhomës Kombëtare të Avokatisë.

Avokati ka të drejtë që kundër këtij vendimi të bëjë rekurs në Gjykatën e Lartë brenda 45 ditëve. Avokat Besart Logu e ka mohuar akuzën e ngritur si të pabazë dhe pa prova nga ana e SPAK-ut.

Ndryshe, Besart Logu ndodhej në “arrest shtëpie” prej datës 10 shtator, kurse ndalimi i përkohshëm nga ushtrimi i profesionit, pritet të ketë ndikim të drejtpërdrejtë në aktivitetin e tij ligjor.