Kosnett: Dhënia fund e dhunës ndaj grave është përgjegjësi e të gjithëve

“Nuk ka asgjë burrërore në të sulmuarit e grave”. Kështu është shprehur Ambasadori amerikan në Kosovë, Philip Kosnett, në Ditën Ndërkombëtare për Eleminimin e Dhunës ndaj Grave duke shtuar:

“Dhënia fund e dhunës ndaj grave është përgjegjësi e të gjithëve. Të bashkuar mund të mbrojmë nënat, motrat, gratë dhe vajzat tona,” tha Kosnett përmes rrjetit social Twitter.

Ndërkohë përfaqësues të shoqërisë civile në Prishtinë theksojnë se dhuna në familje ka shtuar rastet e viktimave të krimit.

Deri në muajin gusht të këtij viti, sipas Policisë së Kosovës, janë shënuar gjashtë raste të vrasjeve në familje dhe të gjitha kanë qenë gra, raporton RFE.

Zyrtarë të Policisë së Kosovës theksuan muaj më parë se në këtë institucion është raportuar për 785 raste të dhunës në familje ku 620 nga to, viktima kanë qenë gra.

Me ndryshimet e fundit të Kodit Penal dhuna në familje është futur si vepër e rëndë penale. Kushdo që e kryen dhunën ose keqtrajtimin fizik, psikologjik ose ekonomik me qëllim të cenimit të dinjitetit të personit tjetër brenda një marrëdhënie familjare, do të dënohet me gjobë ose me burgim deri në 3 vjet.

Ndryshe, fushata kundër dhunës mbi baza gjinore do të zhvillohet për disa ditë në Kosovë.