Kosova dhe Lugina e Preshevës, Osmani dhe Kurti takim me Zv/Ndihm Sekretaren e Shtetit
Çdo sukses i Kosovës mban edhe vulën e Shteteve të Bashkuara, tha Presidentja Vjosa Osmani në takim me Zv/Ndihmës Sekretaren e Departamentit të Shtetit nga Byroja për Demokraci, të Drejta të Njeriut dhe Punë, Nicole Chulick, konfirmuar përkushtimin për vazhdimin e mëtutjeshëm të bashkëpunimit në këtë frymë.
“Në temën e të drejtave të njeriut, Presidentja Osmani ka thënë se Kosova ka kornizën ligjore më të avancuar në Evropë, e cila buron nga Kushtetuta e Republikës. Në këtë drejtim, Presidentja Osmani ka theksuar përkushtimin e Kosovës për ruajtjen e multietnicitetit dhe mbrojtjen e të drejtave të njeriut për të gjithë qytetarët e Kosovës, pa dallim,” ka bërë të ditur Presidenca përmes një njoftimi, pas takimit me Zv/Ndihmës Sekretaren Chulick ku është diskutuar për zhvillimet e fundit, thellimin e mëtutjeshëm të bashkëpunimit Kosovë-SHBA, si dhe të arriturat e vazhdueshme të Kosovës në forcimin e demokracisë, sundimin e ligjit dhe të drejtave të njeriut, duke përfunduar:
“Me këtë rast, Presidentja ka potencuar rëndësinë që të përfundohet suksesshëm anëtarësimi në Këshillin e Evropës, si garancë shtesë për ruajtjen dhe promovimin e të drejtave të njeriut, demokracisë dhe sundimin e ligjit në vend.”
Pas takimit me Presidenten Osmani, Zv/Ndihmës Sekretarja e Departamentit të Shtetit amerikan nga Byroja për Demokraci, të Drejta të Njeriut dhe Punë, Nicole Chulick, ka zhvilluar takim edhe me Kryeministrin Albin Kurti, ku u theksua përkushtimi i lartë i Qeverisë së Kosovës për mbrojtjen dhe promovimin e të drejtave të komuniteteve dhe ndaj sundimit të ligjit.
“Gjatë bisedës, Kryeministri Kurti e njoftoi me politikat dhe masat mbështetëse të qeverisë për komunitetet joshumicë dhe grupet e margjinalizuara, ndër to mbështetja financiare për qendrat e mësimit dhe bursat për nxënës e studentë nga radhët e po këtyre komuniteteve, procesi i verifikimit të diplomave të Universitetit të Mitrovicës së Veriut me qëllim lehtësimin e qasjes në mundësi të punësimit, fondi i veçantë për grante për OJQ, fermerë e ndërmarrës të ri nga komunitete joshumicë, dhe masat e punësimit për 2000 banorë të katër komunave me shumicë serbe në veri të vendit,” thekson Zyra e Kryeministrit përmes një njoftimi për takimin ku Albin Kurtu ka sqaruar masat e punësimit të Qeverisë, duke përfshirë ato për gratë dhe të rinjtë, kanë kontribuar në një rritje të punësimit prej 20 për qind në tre vjet qeverisje.
“Po ashtu, Kryeministri Kurti tha se demokracia dhe zhvillimi shkojnë krah për krah dhe në këtë drejtim theksoi rezultatet e qeverisë gjatë tre vjetëve të fundit në fushën e sundimit të ligjit, siç është konfirmuar nga Indeksi i Sundimit të Ligjit të organizatës ndërkombëtare “World Justice Project”, i cili në 2022 e ka renditur Kosovën në vendin e dytë në të gjithë botën për përmirësim në sundimin e ligjit, pastaj në luftimin e korrupsionit, siç dëshmohet nga përmirësimi për 21 vende në Indeksin e Perceptimit të Korrupsionit të Transparency International, në progresin demokratik siç evidentohet nga Instituti V-Dem që na rëndit të parët në Ballkanin Perëndimor në indeksin e demokracisë elektorale, si dhe përparimin në të drejtat civile dhe liritë politike, sipas Raportit të Freedom House të vitit 2023 që gjithashtu na renditë të parët në Ballkanin Perëndimor,” theksohet përmes njoftimit lidhur me takimin ku Kryeministri Albin Kurti i shprehu Zv/Ndihmës Sekretares shqetësimin e tij në lidhje me spastrimin etnik administrativ të shqiptarëve që po ndodh në Preshevë, Medvegjë dhe Bujanoc nga autoritetet e Serbisë.
Në takim me Zv/Ndihmës Sekretarja e Departamentit të Shtetit amerikan nga Byroja për Demokraci, të Drejta të Njeriut dhe Punë, Nicole Chulick, Kryeministri i Kosovës, Albin Kurti, ishte i shoqëruar nga Zv/Kryeministrja për Çështje të Pakicave dhe Drejtat e Njeriut, Emilija Rexhepi.
