Kosova dhe Shqipëria “tokë e xanun” për pushtetin e Edi Ramës!
nga Prof.Dr.Enver Bytyçi
Kur Edi Rama u bë kryeministër, gjëja e parë që bëri ishte vënia në shitje e veriut të Kosovës. Por jo thjesht në këmbim të parave. Tokë Kosovë në këmbim të pushtetit. Sepse përmes pushtetit do e fitonte paranë dhe përmes parasë do ta ruante pushtetin. Veç parasë atij i duheshin dhe i duhen gjithashtu edhe sot miq e mbështetës në Europë dhe në SHBA. Që kjo mbështetje të ishte e qëndrueshme dhe e besueshme, ai duhej të garantonte lidhje të ngushta me presidentin e Serbisë, Aleksandar Vuçiç me premtimin se ata të dy do të garantonin stabilitetin e rajonit. Por me çmimin e ndarjes së Kosovës si dhuratë për Serbinë e Madhe. Pra, që të ishin këto lidhje solide, duhej plotësuar oreksi i Serbisë për ta aneksuar pjesën më të pasur të Kosovës, veriun e saj. Pra, Kosova u bë tokë e xanun në duart e Edi Ramës për t’ia shit Serbisë në këmbim të ruajtjes së pushtetit në Shqipëri.
Më tej akoma, kryeministri i Shqipërisë u investua fuqishëm për të marrë mbështetjen e presidentit francez. Emmanuel Macron. I dha atij paritet në interesat franceze në Shqipëri si dhe i premtoi se do ta ndihmonte në misionin francez për të plotësuar interesat serbe në Kosovë. Ishte një ofertë në këmbim të mbështetjes së pakufizuar të Macron për pushtetin e Edi Ramës në Shqipëri. Kjo marrëdhënie në funksion të pushtetit shkoi aq larg sa të dy ata në qershor 2023 e kërcënuan Kosovën me izolim, deri te bllokimi për liberalizimin e vizave. Pasi që Albin Kurti nuk po i bënte lëshimet që ata të dy i kishin premtuar Serbisë.
Vitin e kaluar (2024), pra para një viti, Edi Ramës i duhej gjithashtu një ndërmjetës me presidentin në ardhje të SHBA-ve, Donald Trump. Sërishmi për të garantuar vazhdimësinë e pushtetit të tij në Shqipëri. Georgia Meloni asokohe ishte shfaqur hapur përkrah zgjedhjes së zotit Trump si president i SHBA-ve. Aq sa ajo ishte e vetmja lidere europiane që u ftua në ceremoninë e celebrimit të presidentit më 20 janar të këtij viti. Edi Rama, duke nuhatur erën e miqësisë së Melonit me Donald Trump, i kompleksuar dhe i mëkatuar në lidhjet e veta me Sorosin, i kërkoi kryeministres italiane që të ndërmjetësonte për përtëritjen e “miqësisë” së re me presidentin amerikan.
Meloni e kapi momentin. E pyeti kryeministrin e Shqipërisë se çfarë do të përfitonte ajo në këmbim të kësaj kërkese. Dhe zoti Rama pa u menduar aspak i tha se ajo ishte e lirë të kërkonte ç’ti donte zemra. Meloni i kërkoi territor për të torturuar emigrantët, larg syrit të medies italiane, larg syrit të Europës dhe nën mbrojtjen e autokratit Edi Rama. Toka iu dha kësisoj Italisë së Melonit në Lezhë. Sërishmi tokë me shit, por me klering. Pra me përkrahje për të mbajtur pushtetin me dhunë, me grabitje votash dhe me të gjitha metodat staliniste e fashiste. Për Melonin kjo ishte kërkesë pa kokëçarje. Pa siklet të madh. Çfarë i kushtonte asaj të mbështeste Edi Ramën në kërkesat politike të tij për pushtet? Asgjë! Do thoni ju, po demokracia në Shqipëri nuk vlen? Nëse demokracia te ne nuk vlen për ne, pse duhet të vlejë për Melonin e Macronin? Megjithatë zonja Meloni nuk qe e zonja të bëhet njësh me presidentin Donald Trump. Ndaj nuk e ndihëmoi Edi Ramën që së paku t’i jepte dorën presidentit Trump në ndonjë prej samiteve ndërkombëtare, apo në vizitën që bëri presidenti amerikan në Paris me ftesë të presidentit Macron!
Atëherë Rama thirri në ndihmë sozinë e McGonigal, atë që mburret te ballkanasit tanë megalomanë se është mik i presidentit Trump. Ky quhet Richard Grennell. I tha ambasadorit Grennell se Sazanin e kishte rezervuar për vajzën dhe dhëndërrin e Donald Trump. Dhe ambasadori e njoftoi menjëherë familjen Trump për këtë ofertë të Edi Ramës. Ishullit të Sazanit i shtoi edhe një garniturë të majme, Zvërnecin, si qershia mbi tortë. Ishte një ofertë e lakmueshme kjo. Dikush aty pyeti se për çfarë arsyesh e bën këtë kryeministri i Shqipërisë. Përgjigja ishte e thjeshtë: – Për të vazhduar pushtetin me çdo kusht e me çdo mjet. Pra, “Hajde tokë me shit, kundrejt ruajtjes së pushtetit”!?
Presidenti Trump duket se vendosi të heshtë, të qëndrojë indiferent dhe të mos marrë rriskun e një afere të tillë. Por vajza dhe dhëndërri ,të nxitur nga MecGonigali numër dy, tashmë i republikanëve, pra nga Grennelli, vazhduan përpjekjet për të marrë ishullin e Sazanit në këmbim të mbështetjes për Edi Ramën. Mediat italiane kanë njoftuar këto ditë se vajza e zotit Trump ka paguar mbi një milard dollarë amerikanë për ta blerë përgjithmonë këtë ishull. Qeveria nuk flet. Eshtë e zënë me tokën e xanun në trotuare. Dhe shqiptarëve ua shet lirimin e trotuareve në këmbim të shitjes së Sazanit, si “tokë e xanun” e Edi Ramës për ta shit në këmbim të pushtetit të tij auto e kleptokratik.
“Hajde tokë me shit”, është riituali i këngës së Edi Ramës. Të shesë tokën e Shqipërisë e të Kosovës për të mbajtur me dhunë pushtetin. Madje ka filluar të knellet e të sajojë edhe rikthimin e projektit për “shitjen” e veriut të Kosovës. Sërishmi është në veprim Grennell. Tashmë si zëvendës i Alex Sorosit. Aktivizimi i projektit të “shkëmbimit të territoreve”, në Kosovë është qëllimi kryesor i Edi Ramës dhe Aleksandar Vuçiç. Kjo është arsyeja pse ata po i forcojnë marrëdhëniet me Grennell dhe me Kushner. Dhe gjithashtu kjo është arsyeja pse Albin Kurti është bllokuar në të drejtën e tij legjitime për krijimin e institucioneve të Kosovës.
