Kosova e Arabia Saudite heqin vizat për diplomatë dhe zyrtarë
Zv/Ministri i Punëve të Jashtme dhe Diasporës i Kosivës, Kreshnik Ahmeti, u prit sot në Riad nga Zv/Ministri i Punëve të Jashtme i Arabisë Saudite, Waleed Abdulkarim El Khereiji, ku dhe u nënshkrua marrëveshja për heqjen reciproke të vizave për bartësit e pasaportave diplomatike dhe pasaportave zyrtare.
Sipas njoftimit për media nga MPJD, gjatë takimit me Zv/Ministrin për Punë të Jashtme, El Khereiji, u bisedua për ngritjen e bashkëpunimit ekonomik, bashkëpunimin në fushën e mbrojtjes dhe kundër terrorizmit dhe për nisjen dhe finalizimin e marrëveshjeve në fushën e transportit, edukimit dhe sportit.
“Duke vlerësuar lartë bashkëpunimin në mes të dy shteteve, zëvendësministri Ahmeti ka falënderuar Arabinë Saudite për përkrahjen dhe kontributin e vazhdueshëm për Republikën e Kosovës. Ahmeti kërkoi që qytetarët e Republikës së Kosovës të kenë procedura më të lehta për hyrje në Arabinë Saudite”, u tha në njoftim.
Në fund, takimi u përmbyll me nënshkrimin e marrëveshjes për heqjen reciproke të vizave për bartësit e pasaportave diplomatike dhe pasaportave zyrtare.
