Kosova në Këshillin e Evropës, Vuçiç në Paris: Nuk pres shumë, Macron i ka duart e lidhura!

Në kohë të vështira politike për Serbinë, të cilat i paralajmëron Presidenti Aleksandar Vuçiç, ai shkon në vizitë dyditore në Paris ku do të bisedoj me Presidentin e Francës, Emmanuel Macron.

Vuçiç thotë se do të bisedoj për 14 çështje, ndër të cilat industria ushtarake, inteligjenca artificiale, por dhe energjia bërthamore, si e vetmja që garanton furnizim të sigurt me energji elektrike.

Dhe, ku është bashkëpunimi ekonomik aty është dhe politika, kështu që do të bisedoj gjithsesi edhe për anëtarësimin e Kosovës në Këshillin e Evropës, Rezolutën e paralajmëruar për Srebrenicën në OKB, marrëdhëniet me Rusinë dhe integrimet evropiane.

Në daljen e fundit publike, kur iu drejtua kombit, Vuçiç tha se nuk pret shumë kur bëhet fjalë për Këshillin e Evropës sepse Macron i ka duart e lidhura, por beson se Franca do ti shprehë qëllimet miqësore që të ndihmoj aq sa mundet.

Në mbledhjen e jashtëzakonshme të qeverisë, Vuçiç tha javën e kaluar se disa vende që e kanë pranuar pavarësinë e Kosovës mund të mos e mbështesin në KiE, dhe kjo nuk do të jetë vetëm Hungaria!

Por, a do të jetë Franca njëra prej tyre, Ish-Ambasadori serb në Paris, Radomir Dikliç thotë për të përditshmen serbe Danas se Macron këtë radhë ka përgatitur një trajtim të veçantë për Vuçiçin.

“Darkë private, presidenti frances nuk organizon shpesh. E përditshmja me ndikim ‘Figaro’ ka paralajmëruar veçanërisht këtë vizitë. Këto janë sinjale që Franca dhe Macron e kanë të rëndësishme që vizita të ketë sukses. Por kush dhe si e sheh suksesin. Nëse Vuçiç mendon se Franca do ta mbështes Serbinë në OKB dhe se do të jetë kundër anëtarësimit të Kosovës në Këshillin e Evropës, mendoj se e ka gabim. Këto janë çështje rreth të cilave ka konsensus brenda Bashkimit Evropian  dhe është  vështirë të mendohet që Franca do të jetë ajo që do ta shkatërroj këtë konsensus,” vlerëson Dikliç duke sqaruar se nëse miku i konfirmuar Greqia, përmes zonjës Bakoyannis, e respektoi vullnetin e shumicës në BE, Macron këtë vullnet nuk do ta shkel.

Ndërsa Strahinja Subotiç nga Qendra për politika evropiane vlerëson se kjo vizitë e Vuçiçit është më e rëndësishme se ato paraprake, sepse vjen në momentin kur po diskutohet përpjekja e pushtetit në Prishtinë për anëtarësimin në Këshillin e Evropës.

Franca, thotë ai, ka qëndrin të arsyeshëm, sepse pranon Kosovën por insiston në domosdoshmërin e formimit të Asociacionit të komunave me shumicë serbe, si parakusht

Për të përditshmen serbe Danas, ai thotë se kjo do të jetë njëra ndër çështjet kryesore të takimit të dy presidentëve dhe që Vuçiç do të insistoj që Franca të përdor fuqin dhe ndikimin se është e domosdoshme që Prishtina të formoj Asociacionin e komunave me shumicë serbe para anëtarësimit, si dhe të ndikon në shtetet tjera anëtare të KiE.

“Shumica e shteteve anëtare në Këshillin e Evropës e pranon Kosovën dhe Prishtina natyrisht dëshiron që të bëhet anëtare që do të konfirmonte dhe shtetësinë e saj, por nga perspektiva e Serbisë ky nuk është një proces i ndershëm, sepse pushteti në Prishtinë nuk i ka përmbyshur detyrimet me marrëveshjen nga viti 2013, e ky është Asociacioni,“ tha Subotiç pa përmendur që as Serbia nuk i ka përmbushur këto detyrime madje është tërhequr edhe nga disa detyrime të vitit 2011.

Gjithsesi, ai thotë se kjo mbetet për tu parë pasi Gjermania po lobon për antëarësimin e Kosovës në Këshillin e Evropës, e më pas të formohet Asociacioni. Në fund, duke rikujtuar se Macron është mbështetësi më i madh i idesë që Rusia duhet të mposhtet, Strahinja Subotiç nga Qendra për politika evropiane thekson se ai do të kërkoj nga Vuçiç që Serbia të bashkëpunon me BE-në për harmonizimin e politikës së jashtme.

“Shumë çështje do të jenë në tavolinë dhe besoj që Macron do të jetë shumë i qartë. Ndoshta jo në publik, por në bisedë private me siguri se do të jetë shumë direkt kur është fjala për qëndrimin francez. Ai do të kërkojë që situata si ajo në Banjskë kurrë më të mos ndodhë.”