Kosova përballë COVID-19, PDK nuk i bashkohet të papërgjegjshmit, Isa Mustafa

Partia Demokratike e Kosovës nuk i është i bashkuar Isa Mustafës me partitë e papërgjegjshme që janë verbëruar për pushtet, dhe ka marrë pjesë në takimin e ftuar nga kryeministri në detyrë, Albin Kurti për të diskutuar rreth situatës së krijuar me pandeminë COVID-19.

Pas takimit, Kryetarja e Parlamentit, Vjosa Osmani, kërkoi konsensus politik për të luftuar pandeminë, deputeti i PDK, Memli Krasniqi, bëri publike qëndrimet e partisë së tij kidhur me luftën kundër pandemisë dhe 1000 testeve për COVID-19 që i fali Serbia, ndërkoh Kryeministri në detyrë, Albin Kurti, sqaroi fillimisht pranimin e këtyre testeve nga Serbia.

“Testet janë një gjest i Serbisë që nuk duhet të politizohet. Nëse ka rregulluar imazh Serbia e ka rregulluar me anë të marrëveshjeve që udhëheqësit tanë nënshtroheshin. Ne kemi dëshmuar se nuk bëjmë dallime as për nga komuna apo prejardhja. Ne nuk i diskriminojmë askënd,” tha Kurti duke shtuar:

“Nëse Kosova i kishte refuzuar do të akuzohej si një sjellje iracionale. Nëse Kosova nuk do t’i pranonte këto teste, atëherë mund të kishte serb që do të na akuzonin se nuk po mund të testoheshin. Pra, kjo ka mundur të jetë edhe ndonjë grackë, që ne nuk duhet të bijmë.”

Lidhur me deklaratën e presidentit se këtë javë do të ndërmarrë hapa për formimin e Qeverisë, Kryeministri në detyrë, Albin Kurti, tha se Presidenti është jashtë detyrës por ka intencë që të formojë dhe drejtojë vullnet politik në Kosovë.

“Unë jam kryeministër në detyrë por shteti ka një president jashtë detyrës me këtë intencën për të formuar dhe drejtuar vullnet politik në Kosovë. Presidenti është një figurë ceremoniale, le të themi noter shtetëror i cili nuk është një nga shtyllat e pushtetit. Është e qartë se ai nuk është i kënaqur me kompetencat që ka, por te tilla janë me kushtetutë dhe këtë është dashur ta mendojë. Ne po punojmë me të gjitha kapacitetin tonë për luftimin e shpërndarjes së koronavirusit dhe nuk po ngecim në këtë drejtim.”

Dhe jo vetëm kaq! Nëse Presidenti kundër reciprocitetit me Serbinë, tah Albin Kurti, nuk është e çuditshme që një gjë të tillë ta bëjnë edhe ambasadorët.

“Nëse kemi një president që del kundër reciprocitetit me Serbinë nuk duhet të çuditemi me asnjë ambasadorë të huaj. Është rast i pashembullt që kemi një personalitet me detyrë zyrtare i cili del kundër reciprocitetit të vendit të vend. Unë mendoj që ky është kulmi e më keq se kaq e më poshtë se kaq është vështirë të biesh, të deklarohesh kundër reciprocitetit kundër Serbisë në mënyrë parimore.”

Vjosa Osmani: Konsensus politik për të luftuar pandeminë

Kryetarja e Parlamentit të Kosovës, Vjosa Osmani, pas takimit konsultativ me kryeministrin në detyrë, Albin Kurti, kërkoi konsensus politik për të luftuar pandeminë ndërsa lidhur me 1000 testet e marra nga shteti serb tha se asnjë ndihmë e Serbisë nuk mund t’i shlyejë krimet që i ka bërë në Kosovë dhe një çështje e tillë nuk duhet të politizohet.

“Nuk do të duhej të lejonim që luftimi i pandemisë ose masave që duhet të ndërmerren të politizohen. Por duhet një pajtim shumë më i gjerë. Prandaj edhe pjesëmarrja ime në këtë organizim të kryeministrit ishte për të treguar këtë përkushtim. Kur kemi për qëllim shëndeti ne qytetarëve të vendosim si prioritet, çështjet tjera t’i lejmë anash,” tha Osmani duke shtuar se sot e gji thë bota e ka të qartë për krimet serbe që i kanë bërë në Kosovë.

“Unë besoj që jo vetëm ne në Kosovë, por e gjithë bota e ka të qartë për krimet që i ka kryer Serbia në Kosovë. Ato kanë ndodhur para syve të botës dhe janë dëshmuar në Gjykata Ndërkombëtare. Kështu që Serbia tani në këtë kohë të pandemisë edhe mund të ketë dhuruar ndihma, por kjo nuk e shlyen atë qe kemi përjetuar secili prej nesh.”

Me këtë rast Vjosa Osmani foli edhe për aktualitetin politik. Ajo e pranoi se ka një kohë të gjatë që kryesia e LDK-së nuk është duke informuar atë për veprimet e ardhshme për koalicionin qeverisës.

“Jam e painformuar, sapo dëgjova se qenka edhe një takim tjetër ku unë nuk jam ftuar. Nuk është asgjë e re ka një kohë të gjatë në të cilat nuk jam ftuar dhe konsultuar.”

PDK kalon interesat partiake kur janë në pyetje interesat e vendit

Pas takimit me Albin Kurti, deputeti i PDK, Memli Krasniqi tha Partia Demokratike e Kosovës i kalon interesat partiake kur janë në pyetje interesat e vendit.

“Ju them se prezenca e PDK-së është një dëshmi që Partia Demokratike kur janë në pyetje interesat e qyetarëve dhe interesat e vendit i kalojnë interesat partiake. Kemi ardhur t`i shprehim drejtperdrejt qendrimet dhe bindjet tona. Sot isha këtu për t`ia përseritur kryeministrit, për të ju thanë që kanë bërë gabime të jashtëzakonshme, në vend që të koordinohen, ata janë sjellur me nëncmim, me arrogancë,” tha duke shtuar se me pranimin e 1.000 testeve të pranuara nga Serbia, Albin Kurti ia mundësoi Vuçiqit të shpërlahet nga gjenocidi.

“I përsërita qëndrimet e PDK-së për gabimet trashanike të cilat i ka bërë. Ky kryeministër e ka shkel Kushtetutën e vendit. Ky kryeministër është dorëzuar para Serbisë. I ka përligjur masat e jashtezakonshme të vendosura nga Serbia. I ka mundësuar Aleksander Vuçiqit të shpërlahet nga gjenocidi dhe me pranimin e 1000 testeve e kanë shfaqur Serbinë si humane. Ka bërë gabim të pafalshëm duke ia mundesuar këtë gjë.”