Kosova vendos masa të reja reciprociteti ndaj Serbisë

Qeveria në detyrë e Kosovës ka vendosur masa të reja të zbatimit gradual të reciprocitetit ndaj Serbisë. Sipas vendimit masat e vjetra do të vazhdojnë të zbatohen, derisa atyre do t’iu shtohen vazhdimisht ato të reja.

Qeveria në detyrë ka njoftuar se gjatë mbledhjes së fundit ka marrë vendim që reciprocitetit ndaj Serbisë t’i shtohen masa të reja reciprociteti.

Përmes një komunikate, Zyra e Kryeministrit ka bërë me dije se është marrë vendim që të ndalohen dokumentet për produktet bujqësore dhe industriale të cilat hyjnë nga Serbia në Kosovë, që përdorin emra të vendeve ose përmbajnë elemente të tjera që janë në kundërshtim me ligjet e Kosovës.

“Plotësim-ndryshimi i vendimit të mëhershëm për marrëdhëniet tregtare me Serbinë, nënkupton ndalimin e dokumenteve për produktet bujqësore dhe industriale që përdorin emra të vendeve që përmbajnë elemente të tjera në kundërshtim me Kushtetutën e Republikës së Kosovës, emrat e vendeve në Republikën e Kosovës, por pa emërtimin e shtetit, që nuk i referohen me Republika e Kosovës dhe përmbajnë çfarëdo elementi që mohon pavarësinë dhe sovranitetin e Republikës së Kosovës”.

Tutje Qeveria ke treguar se Agjencia e Ushqimit dhe Veterinarisë obligohet të përdorë stemën dhe emrin Republika e Kosovës në certifikatat fitosanitare dhe veterinare,

“Agjencia e Ushqimit dhe Veterinarisë obligohet të përdorë stemën dhe emrin Republika e Kosovës në certifikatat fitosanitare dhe veterinare, ndërsa operatorët ekonomikë nga Serbia duhet të pajisen me leje hyrëse për secilin automjet të transportit të mallrave që hyn në Republikën e Kosovës nga Zyra Ndërlidhëse e Republikës së Kosovës në Serbi”, thuhet në njoftimin e Qeverisë së Kosovës.

Vendimi, raporton Monitor, mbetet në fuqi për afat të pacaktuar, ndërsa nuk mund të njihet si person juridik një shoqëri tregtare e themeluar sipas rregullave të autoriteteve në Serbi, por vetëm në pajtim me Ligjin për shoqëritë tregtare.