Kosovarët me domate, Nordikët me letra higjienike!
Nga Agim Popoci
Një turist nordik elitar i Edi Ramës nuk bindej ta fuste kartën e tij të kreditit në trajtimin mizor të bankave shqiptare sepse nuk ishte dakord me çmimin e letrës higjienike që iu shfaq në arkën e një supermarketi afër Pazarit të Tiranës!
Radha po shtohej, nordiku elitar kokën guri, po thoshte se çmimi në rafte ishte 290 lekë dhe këtu po i llogaritet 309 lekë, dhe derisa shqiptarëve në radhë po i humbej durimi në këtë ditë përvëluese, një nënë shqiptare ia behu me batutën urbane:
“Eee ankoheshin në Golem, me kosovarët që hanë domate!”
Ndonëse fjalë e dalë nga një grua e moshuar shqiptare në debat mëngjesor, “kosovarët me domate” është akuzë e dalë nga goja e pronarëve të hoteleve dhe restoranteve nga Velipoja në Ksamil, që në rastin më të mirë i ngritën bizneset e tyre kryesisht nga turistët kosovarë, që jep dhe përgjigjen se pse sot Kryeministri Edi Rama me këta pronarë nuk e realizon rrëfenjën e tij për pritjen e 14 milionë turistëve në bregdetin shqiptarë, që do të vijnë sivjet nga e gjithë bota!
Fillimisht pronarët e hoteleve dhe restoranteve kur shohin lokalet e tyre bosh duhet ti drejtohen një objekti që e kanë në çdo cep të atij vendi që kanë investuar me shumë djersë dhe quhet, pasqyrë!
Kjo pasqyrë do t’ju tregoj se çfarë llumi ishin, si bashkëjetonin me ujërat e zeza sepse të bardhin nuk ua jepte shteti, dhe aty ushqeheshin vetëm kosovarët!
Që kishte turistë kosovarë që hanin domate, nuk mund ta mohojë njeri, por që kishte turistë kosovarë që euron e paguanin 100 edhe kur ajo ishte 130 lekë, edhe kur hanin peshk ose ndonjë mish çasti, as këtë nuk mund ta mohoj njeri!
Kjo pasqyrë do t’ju tregoj se ishte një kohë kur nuk lëviznin dot në bregdetin shqiptar, jo nga turistët e huaj por nga autobusët përplot me turistë kosovarë, edhe aty ku hahej vetëm domatja!
Kjo pasqyrë do t’ju tregoj edhe si përfundonin në rrugë këta kosovarë që hanin domate sepse dhomën që kishin rezervuar, këta pronarë elitar e kishin zënë me një të huaj; Pa përjashtuar rastet, kur këta të huaj nuk ishin vetëm nordikë dhe italianë, por, dhe kosovarë nga Zvicra, Gjermania, Belgjika etj.
Kjo pasqyrë do t’ju tregoj se si rriteshin çmimet sepse rritej euro dhe në asnjë rast nuk ndodhte e kundërta, kur euro binte! Madje kakofoninë e Kryeministrit e përdorën edhe tek arsyetimet e tyre për rritjen e çmimeve: Lufta në Ukrainë!
Në fund kjo pasqyrë do t’ju tregoj se, po, hotelet dhe restorantet i ngritën, por, një gjë nuk e bënë dot ndonëse u vizituan nga miliona kosovarë që hanin domate, dhe mijëra të tjerë që i pagëzuan nordikë, shërbimin!
Kur ta pranojnë këtë realitet, që nuk kanë shërbim cilësor ndonëse kanë ngritur objekte të jashtëzakonshme hoteliere, dhe, se me broçkullat e Kryeministrit Edi Rama nuk krijohet turizmi elitar, por, me aftësimin profesional të punonjësve të tyre, mund të shikojnë nga e ardhmja pa paragjykuar menynë që përzgjedhin turistët!
Pastaj, me shërbim elitar ka vend dhe për çmime elitare, madje dhe për paragjykime kur shikohen plazhet bosh, por, jo për fantashkencë me grekët!
Gjithë kjo shpurë e pronarëve të hoteleve dhe restoranteve të ekzaltuar në krah të Edi Ramës duhet ta dinë se kosovarët ka vite që kishin të drejtë të shkonin në Greqi gjatë sezonit veror, dhe këtë nuk ua mundësoi as liberalizimi i vizave dhe as lufta speciale greke!
Ata nuk ikën në Greqi, ata i përzutë ju duke i vjedhur dhe duke i përbuzur, sapo patë 2-3 nordikë duke ngrënë misër, ose 4-5 polakë duke u pirë birrë! Dhe, ata nuk i shikuat nga pjata si kosovarët dhe mirë bëtë, ama as atyre nuk iu ofruat atë që nuk arritën kurrë ta gëzojnë kosovarët, shërbimin!
Nuk ka asgjë të keqe nëse ekzaltoheni së bashku me Lali Erin kur shikoni Pazarin e Tiranës plotë me turistë të huaj, por nuk duhet të bezdiseni kur shikoni se ata mbajnë në dorë letër higjienike! Aq më shumë nuk duhet të bezdiseni kur shkaktari jeni Ju, dhe, bariu juaj që po jep rrëfenja dhe jo ndihmë se si të përmirësohet shërbimi aq i domosdoshëm për turizmin!
Dhe, harroni me shpejtësi edhe rrëfenjën e Edi Ramës se vjet ishin 4.6 milionë kosovarë! Sikur të ishin aq në numër, qoftë dhe të llojit që përgojohen nga pronarët e hoteleve dhe restoranteve, këtu do të bëhej nami jo vetëm me prodhimin e domates, por dhe me shezlonget, çadrat dhe aksesorët tjerë turistik që shërbehen në plazhet shqiptare!
