Kosovarët ndalohen në pikat kufitare të Serbisë, Kurti: Hakmarrje për Këshillin e Evropës

Pas ndalimit të rreth 300 shtetasve të Kosovës në pikëkalimet kufitare të Serbisë duke filluar nga nga orët e mbrëmjes të së martës, ka reaguar Kryeministri Albin Kurti duke cilësuar këtë veprim si hakmarrje të Serbisë për votimin në Këshill të Evropës.

“Një ditë pas votimit në favor të anëtarësimit të Kosovës në Këshill të Evropës, Serbia hakmerret ndaj civilëve kosovarë. Që nga mëngjesi i sotëm, mbi 300 shtetas tanë – përfshirë fëmijë – janë ndaluar arbitrarisht në kufij, janë privuar nga ushqimi dhe medikamentet. Shkelje flagrante e të drejtave të njeriut,” shprehet Kryeministri i Kosovës, Albin Kurti, në reagimin e tij përmes rrjetit social X.

Ndërkohë nga vendkalimi Dheu i Bardhë raportohet se nga mëngjesi ka pasur raste kur policia kufitare e Serbisë ka ndaluar qytetarë pa ndonjë arsye, për t’i marrë në pyetje, por kjo pikë kufitare po vazhdon të funksionojë normalisht thonë ekipet e Policisë së Kosovës.

Ndryshe, gjithçka filloi pas votimit në Asamble Parlamentare të Këshillit të Evropës të rekomandimit për anëtarësimin e Kosovës në KiE, kur rreth 300 qytetarë të Kosovës mbetën të bllokuar në kufirin Kroaci-Serbi ndërsa iu morën të gjitha dokumentat e udhëtimit dhe autobusëve me të cilët po udhëtonin.