Kosovë, 27 komuna përmbyllin numërimin e votave, më 1 janar vazhdon në 11 të tjera

Komisioni Qendror i Zgjedhjeve, KQZ, njofton se deri më tani është përmbyllur verifikimi i rezultateve të subjekteve politike dhe numërimi i votave të kandidatëve për deputetë në 27 komuna: Mamushë (6), Shtërpcë (17), Junik (6), Hani i Elezit (11), Kllokot, Partesh (7), Mitrovicë e Veriut (22), Novobërdë (23), Zveçan (11), Viti (64), Zubin Potok (15), Ranillug (10), Dragash (57), Istog (62), Obiliq (33), Gllogoc (73), Deçan (51), Shtime (34), Klinë (63), Kamenicë (50), Fushë Kosovë (62), Leposaviç (25), Graçanicë (33), Vushtrri (95), Rahovec (78), Skënderaj (72) dhe Kaçanik (45).

Nga 78.41 për qind e votave të numëruar në Lëvizjen Vetëvendosje aktualisht kryeson Albin Kurti me 273.518  vota, pasuar nga Glauk Konjufca me 213.033 vota ndërsa i treti renditet Albulena Haxhiu me 112.019 vota.

Në Partinë Demokratike të Kosovës aktualisht kryeson Bedri Hamza me 125.963 vota, pasuar nga Arian Tahiri me 57.601 vota, ndërsa i treti renditet Përparim Gruda me 53.632 vota.

E treta, Lidhja Demokratike e Kosovës në krye të renditjes ka turpin e kësaj partie, Lumir Abdixhiku me vetëm 61.386 vota, pasuar nga Hykmete Bajrami e aftë për të akuzuar por jo edhe për t’u votuar me vetëm 38.653 vota, ndërsa i treti renditet Ukë Rugova me 33.895 vota.

Procesi i numërimit do të vazhdojë të enjten, më 1 janar 2026, në orën 16:00, në 11 QKN-të e komunave: Prishtinë, Pejë, Prizren, Podujevë, Mitrovicë e Jugut, Gjakovë, Malishevë, Lipjan, Gjilan, Ferizaj dhe Suharekë.

Ndryshe, nga 100 për qind e votave të numëruara të zgjedhjeve parlamentare të 28 dhjetorit, rezulton që e para renditet Lëvizja Vetëvendosje e Albin Kurtit duke shënuar dhe rekordin historik me 433.394 vota ose 49.34 për qind.