Kosovë, 7 ankesa në PZAP lidhur me rezultatin përfundimtar të zgjedhjeve

Pas publikimit të rezultateve përfundimtare nga Komisioni Qendror i Zgjedhjeve, KQZ, për zgjedhjet e mbajtura më 28 dhjetor 2025, Paneli Zgjedhor për Ankesa dhe Parashtresa,PZAO, ka pranuar gjithsej shtatë 7 ankesa.

PZAP saktëson se pesë ankesa i ka pranuar nga subjektet politike dhe dy ankesa nga një kandidat për deputet të Parlamentit të Kosovës, për legjislaturën e ardhshme, dhe për të gjitha shtatë ankesat do të vendosë brenda afatit ligjor prej 96 orësh nga data e parashtrimit.

Ankesat e pranuara janë:

Një (1) ankesë nga PARTIA ROME E BASHKUAR E KOSOVËS – PREBK,

Dy (2) ankesa nga PDK – kandidati Bekim Haxhiu,

Një (1) ankesë nga Koalicioni PAI–PDAK–LPB,

Dy (2) ankesa nga NOVA DEMOKRATSKA STRANKA – NDS,

Një (1) ankesë nga SRPSKA LISTA,

“PZAP do të vendosë për të gjitha ankesat brenda afatit ligjor prej 96 (nëntëdhjetë e gjashtë) orësh, në përputhje me Ligjin nr. 08/L-228 për Zgjedhjet e Përgjithshme në Republikën e Kosovës”, thuhet në përgjigjen e PZAP për RTK.

Ndryshe të shtunën Komisioni Qendror i Zgjedhjeve, mori vendim për shpalljen e rezultateve përfundimtare të zgjedhjeve të parakohshme, të cilat janë mbajtur më 28 dhjetor.

Rezultatet u shpallën për 23 nga 24 subjektet politike dhe kandidatët e tyre. Shpallja e rezultateve përfundimtare për subjektin politik Lista Serbe dhe kandidatëve të saj, nuk mori votat e mjaftueshme të anëtarëve.