Kosovë, 86 raste me koronavirus, 7 në gjendje të rëndë

Në Kosovë janë 86 të infektuar me koronavirus, ndërsa një pacient ka ndërruar jetë. Lajmin e bënë të ditur për RFE Drejtori i Departamentit për informim në Ministrinë e Shëndetësisë, Faik Hoti, duke shtuar se rreth 7 mijë teste të reja, që shërbejnë për të testuar pacientët që dyshohen se janë infektuar me koronavirus, kanë arritur në Kosovë.

“Materialet ose testet janë në Kosovë dhe ato mund të shfrytëzohen nga Instituti Kombëtar i Shëndetësisë Publike të Kosovës,” tha Hoti duke saktësuar se testet janë sjellë nga Shtetet e Bashkuara, Gjermania dhe Anglia, përmes një kompanie vendore.

Ndërkohë infektologu Sali Ahmeti ka bërë të ditur se në Klinikën Infektive në QKUK aktualisht janë të shtrirë 32 persona të prekur me COVID-19. Shtatë prej tyre janë në gjendje më të rënduar, ndërsa të tjerët janë në gjendje stabël.

“Të tjerët ndodhën në izolim shtëpiak, dhe përkundër se kanë rezultuar pozitiv nuk kanë manifestime klinike të sëmundjes,” tha infektologu Salih Ahmeti, duke i bërë thirrje qytetarëve që të mos të humbin durimin dhe të respektojnë masat e rekomanduara. 

Ndryshe, Qeveria, tani në detyrë e Kosovës, ka shpallur gjendje emergjente për shëndetin publik.