Kosovë, drejt kutive të votimit për qeveri shqiptare të pavarur nga Vuçiçi!

Përpjekjet për të mobilizuar votuesit për zgjedhjet e 14 Shkurtit në Kosovë ishin të jashtëzakonshme ashtu si dhe këto zgjedhje parlamentare që u shkaktuan nga partia e paligjshmërisë, LDK. Por, premtimet ishin po ato të vitit 2019 vetëm se Avdullah Hoti i dha të drejtën vetes të cilësohet, “babai i marrëdhënieve me Amerikën”, Hoxhaj dhe Limaj me partitë e tyre si çlirimtar të Kosovë ndërsa Ramush Haradianj me AAK-n si partia që do ti jap Kosovës Presidentin.

Lëvizja Vetëvendosje ndoshta edhe për shkak të sondazheve që i japin fitore të sigurt kishte tubime odash, me fjalime me shumë pak fjalë ku dominoi togfjalëshi i fitores me shumicë parlamentare, duke pretenduar një qeveri të pavarur nga Lista Srpska e Vuçiçit.

Kanadidati për Krymeinistër i Lëvizjes Vetëvendosje, Albin Kurti, duke këruar në Prishtinë mbështetjen për të siguruar shumicën parlamentare më 14 shkurt u zotua se nuk do të lejoj përsëritjen e skenarit të 25 Marsit 2020 kur u rrëzua qeveria e drejtuar nga ai.

“Për ta bërë ndryshimin që po kërkojmë duhet ta sigurojmë shumicën parlamentare të nevojshme sepse nuk duhet të lejojmë që të na përsëritet skenar i vitit të kaluar, nuk duhet të lejojmë që të na përsëritet 25 marsi i vitit 2020, kur u rrëzua qeveria në kulmin e pandemisë në njërën anë, dhe në kulmin e punëve të mira në anën tjetër, këtë nuk duhet ta lejojmë dhe nuk do të lejojmë, vetëm nëse dalim masivisht në zgjedhje dhe vendosim krejt dhe vendosim drejtë për Lëvizjen dhe listën me numrin 127,” tha Albin Kurti duke shtuar se 14 shkurti do të kujtohet nga gjeneratat e reja si ditë kur populli është bashkuar si asnjëherë më parë ndërsa përfundoi:

“Sepse ne jemi bashkë për të mirë, sepse ata janë bashkë për të vjedhur, sepse ne po vimë, sepse ata po shkojnë.”

Vjosa Osmani: Hapni rrugë, ndryshimi po vjen

Në sheshin “Skënderbeu” në Prishtinë, Vjosa Osmani e cila po garon në listë me Lëvizjen Vetëvendosje si kandidate për President, tha se Kosova do të bëhet shtet i ëndrrave të qytetarëve.

“Nga këtu e kemi një mesazh për kapësit e shtetit, hapni rrugë sepse ndryshimi po vjen. 30 vite më parë, i madh e i vogël në Kosovën tonë të dashur, secili qytetar me të drejtë vote ka votuar me vullnet që ta bëjë Kosovën shtet të pavarur në referendumin e vitit 1991. 30 vite pas të gjithë ne bashkë do ta bëjmë Kosovën shtetin e ëndrrave tona duke i larguar e duke i dërguar në pension ata që keqpërdorën vullnetin tuaj, ata që iu gënjyen, ata që kurrë nuk u interesoj interesi juaj por vetëm xhepat e vet,” tha Vjosa Osmani duke shtuar se ka qenë vullnet i qytetarëve që Osmani dhe Lëvizja Vetëvendosje të garojnë bashkë në një liste zgjedhore ndërsa përfundoi:

“Pas 14 shkurtit Kosovës sonë të dashur do t’ia japim sërish qeverinë e shpresës por kësaj radhe jo për 52 ditë por për 4 vite të plota.”

Kurti: Mërgata është nisur drejtë Kosovës me 127 kilometra në orë

“Ka javë që mërgata jonë është nisur me shpejtësi 127 kilometra në orë për të votuar e festuar në Kosovë, natyrisht e kam fjalën 127 kilometra në por në pjesë ne autostradave në Gjermani ku nuk ka kufizime e në Itali ku kufizimi është 130 kilometra në orë, por sigurisht që mërgatën i kemi në mendje e në zemër e mirë se vinë shpejtë dhe sigurt në krejt Kosovën, drejtë 14 shkurtit,” tha Kurti duke vazhduar me Osmanin vizitat në Lipjan dhe Fushë Kosovë.

Hoxhaj: Fitorja jonë do të jetë e madhe

UÇK, Hashim Thaçi e Kadri Veseli janë fjalë me të cilat kandidat për Kryeministër, Enver Hoxhaj, filloi tubimin përmbyllës të Partisë Demokratike të Kosovës në Vushtrri ku u shpreh i bindur se fitorja e PDK-së do të jetë e madhe.

“Çdo kush ka menduar që pas 5 nëntorit kur PDK e pësoi një goditje të madhe që erdhi nga Gjykata Speciale, ne si PDK do dorëzohemi. Një parti që është themeluar prej të burgosurve politik, nuk e ngrit flamurin e bardhë të dorëzohet. I madh e i vogël për shkak të Kadri Veselit e të Hashim Thaçit, UÇK-së, e kanë kthyer kudo, në Vushtrri, Skenderaj, Prishtinë, kudo në Kosovë e kanë përkthyer goditjen, dhimbjen, lëndimin, në mbështetje të re politike dhe pikërisht për shkak të mbështetjes e respektit dhe dhimbjet që kanë ndje për liderët e UÇK-së e PDK-së kudo në nivel vendi, PDK-ja ka treguar unitet e vendosmëri, që po përkthehet kudo në votë për PDK-në,” tha Enver Hoxhaj duke folur për një program për 4 vjet për të gjitha kategoritë.

“Ne do bëjmë ata që çdo herë PDK-ja e ka bërë. Do e ngrisim rritjen ekonomike, krijimi i vendeve të punës për shkak se pandemia e ka godit me të madhe ekonominë dhe qytetarët po varfërohen.”

E pamshmangshme ishte edhe situata me COVID-19.

“Po te isha unë kryeministër një pjesë e qytetarëve do ta kishin marr vaksinën kundër Covid-19. Nuk është detyrë e drejtorave rajonal të spitaleve e as mjekëve, është detyrë e kryeministrit ta sigurojë vaksinën. Unë duke qenë në opozitë e kryetar në detyrë, jam marr edhe me temën e vaksinës kam thirr kryeministra të vendeve evropianë e të lindjes së mesme, dhe unë ju garantojë që me PDK-në 50% e popullatës do te vaksinohet në 2021”.

Hoti, nga shteti tek vettingu!

Slogani “Shteti.Shtet.” tregon se çfarë partie pa lidhje është LDK, kur është në duart e Isa Mustafës, ndërsa kandidati për Kryeministër Avdullah Hoti e përmbylli fushatën me premtimet boshe që as në letër nuk arriti ti rendit mirë.

Godasin njëri tjetrin me karrige, dhe po këtë parti kandidati i saj për kryeministër, Avdullah Hoti, e quan me kulturë demokratike për të respektuar institucionet shtetërore dhe publike e për t’i fuqizuar ato.

“Për Lidhjen tonë, shteti është mbi të gjitha. Ne jemi ata, të cilët në themelet e angazhimit politik kemi pasur gjithmonë zhvillimin e Kosovës, si shtet i të barabartëve dhe shtet i të drejtës. Ne respektojnë institucionet e shtetit dhe i fuqizojnë ato. Ne nuk i diskutojmë vendimet e drejtësisë edhe atëherë kur nuk na shkojnë përshtati. Sepse shteti ndërtohet duke e respektuar atë, duke punuar për të, duke e vënë interesin e shtetit mbi të gjitha,” tha Hoti duke i sugjeruar qytetarëve që të krahasojnë qeverisjet e kaluara, dhe të mos i dëgjojnë premtimet boshe të kundërshtarëve.

Po cilat janë premtimet e Hotit që nuk ishin boshe. Asnjë, që nga rrëzimi i Qeverisë Kurti në kohë pandemie e deri më sot kur përmbylli fushatën dhe foli për procesin e vetingut, i cili ndonëse ka shkatërruar sistemin e drejtësisë në Shqipëri dhe është ndaluar të aplikohet në shtetet tjera, për Avdullah Hotin do të bëjë ndryshime nëse ai bëhet Kryeministër i ardhshëm.

“Ne, për 7 muaj qeverisje, e hoqëm nga diskursi publik fjalën korrupsion. Sepse ne qeverisëm me duar të pastra. Sepse Lidhja Demokratike nuk angazhohet për pushtet, por për shtet,” tha Kryemnistri më i dështuar në historinë e Kosovës, Avdullah Hoti i cili për gjatë 10 ditë të fushatës u mburrë me atë që nuk ka kurrfarë merite ndonëse e ka firmosur, Marrëveshjen e Washingtonit.

Haradinaj: Më 14 Shkurt do vendoset cilën rrugë do ta merr Kosova!

Kandidati për president i Aleancës për Ardhmërinë e Kosovës, Ramush Haradinaj, në tubimin përmbyllës të fushatës zgjedhore për zgjedhjet e 14 shkurtit, tha se për dy ditë merret vendimi me votë, dhe do vendoset se cilën rrugë do ta merr Kosova.

“Këto zgjedhje janë referendum dhe janë të paktën për dy tema me rëndësi. E para statusi ynë ndërkombëtar ose fati ynë në integrimet euroatlanike. Ka 20 vjet nga çlirimi që të finalizohet shtetësia jonë. Tash kur edhe pas 20 vitesh nuk jemi afër këtyre synimeve atëherë këtë diele vendoset a do të presim edhe 20 vjet dhe si do të kryejmë punë”, u shpreh Haradinaj. Sipas tij, nëse votohet Aleanca, atëherë votohet edhe ai si president i cili do t’i kryej punët e Kosovës duke mos e përfillur Serbinë.

“Pse jam kaq i sigurt që do të ecim përpara, se nëse deri më 2025 nuk jemi në OKB e NATO atëherë unë do punoj që ne bashkë me votë të vendosim për union me Shqipërinë. Nëse ky drejtim i yni nuk i pëlqen Vuqiqit atëherë i them unë sot përgjigjen. Hiçu prej Kosovës dhe lejoje që të ec në rrugën e vet drejt organizatave ndërkombëtare, njihje Kosovën dhe të kemi paqe”, theksoi Haradinaj. Ndër tjera, ai tha se vota e tyre të dielën, do e përcaktojë si do të vazhdojë tutje demokracia jonë.

“Nëse votojmë 135, atëherë votojmë për presidentin i cili do jetë aty ta ndihmojë qeverinë dhe kalojë nga kriza ekonomike dhe gjitha punët që e presin. Por edhe do ta korrigjoja dhe parandaloj për gabimet që mund të jenë të dëmshme për demokracinë tonë. Unë jam përcaktuar t’i dalë përball Serbisë dhe në këtë përballje kam përvojë pasi gjithë jetën ia kam kushtuar Kosovës” veçoi kreu i AAK-së Haradinaj. Siç tha kandidati për president, AAK-ja i siguron Kosovës një president të aftë të siguroj unitetin dhe ta mbroj vendin në etapa të rëndësishme që i kemi para vetës.

“Së bashku do ta bëjmë Kosovën e fortë atë ditë që do të votojmë. Ju falënderoj që edhe pse në kohë pandemie kam pasur nderin të ju takoj në shumë takime. Më 14 shkurt të bashkuar, shkojmë të fortë”, përfundoi ai.

Limaj: 14 Shkurti, vulë e zërit çlirimtar të Kosovës

Kryetari i Nismës Socialdemokrate, Fatmir Limaj sot në tubimin përmbyllës në sallën e Sportit të shkollës “Fadil Hisari” në Prizren e bëri të qartë se 14 shkurti do t’i prishë kalkulimet e atyre që kanë tentuar ta shuajnë zërin çlirimtar të Kosovës.

“Zëri, shpirti dhe zemra e çlirimtarit asnjëherë nuk duhet të pushojë. Ajo duhet ta na udhëheqë në detyrat tona publike dhe në jetën tonë të përditshme. Kemi vizituar njerëz të profileve të ndryshme dhe të gjithë kemi ndarë shqetësimin se ka filluar të zbehet ajo mbi të cilën është ndërtuar shteti ynë.

Luftëtarët duan që të respektohet, nderohet dhe vlerësohet historia jonë që e ka sjellë pavarësinë e Kosovës. Na kanë inkurajuar që të vazhdojmë me këtë kauzë. Sot ne ndihemi të plotësuar si ekip i cili e ka kthyer këtë kauzë në epiqendër të fushatës elektorale”.

Duke folur për rivalët e tij Limaj tha se ata nuk e njohin popullin e tyre – ata janë larguar nga zëri çlirimtar duke menduar se iu kushton në fushata elektorale. Sipas tij, ata nuk e dinë se nëpër çka ka kaluar populli i Kosovës për të ardhur deri tek liria.

“Më shumë se kurrë ka nevojë për një mbështetje masive nga kjo zonë e vuajtur e krenare. Ftesa ime është për ju miq e bashkëluftëtarë, ju ushtarët e Remzi Ademit e Xhevat Berishës, do të shkoni prapa Zafir Berishës apo Enver Hoxhës?

Ju shokë të luftës, nga do të rreshtoheni, me ata që ishin gjithmonë me ju apo me ata të cilët kur ju sakrifikoheshit, ju shikonin nga kryeqytetet Evropës, ju fyenin dhe ju shanin për sakrificën që e bënit?.

Edhe ushtar i Remziut e i Xhevatit, e tani i rreshtuar te Enveri, nuk shkojnë bashkë, një drejtim duhet marrë të dielën. Hajde burra rreshtohemi sikur në vitet 1998-99 e t’i japim fund kësaj pune,” tha Ftamir Lima duke shtuar se bashkëluftëtarët janë ngritur të gjithë në këmbë që zërin e çlirimtarëve fuqishëm ta dërgojnë në Parlamentin e Kosovës.

“Ne jemi të ndërtuar me atë brumë që kur Kosova ka nevojë, ne nuk shikojmë parti dhe interesa të ngushta – kështu kemi bërë në vitet 1998-99. Jemi bashkuar nga rrethana e shtresa të ndryshme të popullit.

“Numri 121 nuk është numër i një njeriu ose partie, është numër i çdo ushtari, dëshmori e invalidi. Është numër i krenarisë dhe i fitores,” tha kreu i Nismës, Fatmir Limaj duke përfunduar:

“Aty ku nuk votohet me zemër, nuk bën as me dorë të votohet. Ne ju themi se askush më mirë dhe në mënyrë më të vendosur sesa ne këtu nuk i mbron këto vlera qoftë brenda dhe jashtë vendit”.

Ndryshe, Lista përfundimtare e votuesve për zgjedhjet e parakohshme për Parlamentin e Kosovës që do të mbahen më 14 shkurt, ka 1 milion e 794 mijë e 862 votues ose 143 mijë e 6 votues më pak se në zgjedhjet e 6 tetorit 2019; Nga kjo listë janë larguar 122 mijë e 421 votues të cilët kanë vetëm dokumente të identifikimit të lëshuara nga UNMIK-u, si dhe për shkak të largimit të 11 mijë e 86 të cilët janë konfirmuar se janë larguar nga skema pensionale për shkak të vdekjes.

Siç njofton Komisioni Qendror i Zgjedhjeve, KQZ, numri i Qendrave të Votimit në të gjithë vendin është 888 me gjithsej 2 mijë e 382 vendvotime.

Gjithashtu, sipas listës përfundimtare të certifikuar u bë e ditur edhe për të dhënat e votuesve nga jashtë Kosovës, të cilët janë regjistruar suksesshëm gjatë periudhës së aplikimit (13 – 21 janar).

Gjatë periudhës së aplikimit, KQZ-ja ka pranuar gjithsej 130 mijë e 168 aplikacione për regjistrim. Pas vlerësimit të aplikacioneve janë aprovuar 102 mijë e 100 aplikacione, ndërsa janë refuzuar 28 mijë e 68 aplikacione. Arsyet e refuzimit janë të ndryshme, por pjesa më e madhe e tyre, 15 mijë e 933 aplikues janë refuzuar për shkak se kanë dërguar vetëm formularin e aplikimit për regjistrim, ndërsa 11 mijë e 164 aplikues janë refuzuar për shkak se nuk i kanë dëshmuar ose identitetin ose kriterin e zotësisë juridike dhe ose aplikacionet për regjistrim kanë qenë të panënshkruar.