Kosovë, KQZ: Partitë kanë të drejtë t’i shpenzojnë deri dy milionë euro në fushatë

Komisioni Qendror i Zgjedhjeve, KQZ, ka vendosur sot se në fushatën për zgjedhjet e 9 shkurtit në Kosovë, një subjekt politik ka të drejtë të shpenzojë deri në 2.047.149 euro, pra jo më pak se një (1) euro për votues të regjistruar.

 “Kjo llogaritje është bërë duke u mbështetur në Rregulloren Zgjedhore nr. 07/2024 2024 për Fushatën e Zgjedhjeve, Monitorimin e Fushatës së Zgjedhjeve si dhe duke u mbështetur në të dhënat e listës preliminare të votuesve, sipas të cilës numri i votuesve në vendin tonë është 2,047,149 votues,” tha drejtori i Zyrës për Regjistrim, Certifikim dhe Kontroll Financiar, Besnik Buzhala.

Në kuadër të përgatitjeve për organizimin e Zgjedhjeve për Kuvendin e Kosovës, KQZ mori vendim edhe për themelimin e Komisionit për shqyrtimin e kundërshtimeve administrative të parashtruara kundër njoftimit për regjistrim të votueseve jashtë Kosovës. Sipas Ligjit nr. 08/L-228 për Zgjedhjet e Përgjithshme, çdo aplikues, të cilit i është refuzuar regjistrimi, ka të drejtë në kundërshtim administrativ ndaj njoftimit brenda Komisionit Qendror të Zgjedhjeve.

Ndryshe, pas konsultimeve me liderët e partive parlamentare, Presidentja e Kosovës, Vjosa Osmani, ka caktuar 9 shkurtin e vitit 2025, si datë kur do të mbahen zgjedhjet e rregullta parlamentare.