Kosovë, KQZ shpall rezultatin: LVV 49.952%, Vjosa Osmani 300.788 vota

Komisioni Qendror i Zgjedhjeve, KQZ, ka shpallur rezultatet përfundimtare të zgjedhjeve të 14 shkurtit në Kosovë ku fitues rezulton Lëvizja Vetëvendosje me 438.334 vota ose 49.95 për qind, ndërsa personi më i votuar është Vjosa Osmani me 300.788 vota.

Pas Vetëvendosjes, partia e dytë më e votuar rezultoi Partia Demokratike e Kosovës me 148.296 vota dhe e treta Lidhja Demokratike e Kosovës me 110.978 vota.

“Numri i votuesve 814.122 votues. Numri i votuesve 89.257 votues jashtë kutive të votimit. Pjesëmarrja në votime 48.77%. Lëvizja Vetëvendosje ka marr 438.334 vota, PDK 148.296 vota dhe e treta ka përfunduar Lidhja Demokratike e Kosovës me 110.978 vota, AAK 62.111 vota. Lista Serbe 44.404 vota,” tha Kryetarja e KQZ, Valdete Daka.

Sipas këtij rezultati,  Lëvizja Vetëvendosje e Albin Kurtitdo të ketë 58 ulëse, Partia Demokratike e Kosovës 19, Lidhja Demokratike e Kosovës 15, Aleanca për Ardhmërin e Kosovës 8, Lista Srpska 10, Partia Demokratike Turke e Kosovës 2, Iniciativa Rome 2, Koalicioni Vakat 1, Komuniteti i Bashkuar Adrijana Hoxhiq 1, Partia e Re Demokratike 1, Partia Gorane 1, Inciativa e Re Demokratike e Kosovës 1 dhe Partia e Ashkalinjëve për Integrim 1.

Pas Vjosa Osmanit me 300.788 vota rendit, Enver Hoxhaj i PDK me 100.518 vota, Avdullah Hoti i LDK me 69.640 vota, Ramush Haradinaj i AAK me 41.406 vota dhe Sllavko Simiç nga Lista Srpska me 19.728 vota.

Pas shpalljes së rezultatit nga KQZ, partitë dhe kandidatët për deputetë, brenda 24 orëve mund t’i drejtohen Panelit Zgjedhor për Ankesa dhe Parashtresa, PZAP, nëse kanë ankesa. Të drejtë ankese ata më pas mund të bëjnë edhe në Gjykatën Supreme.

Më pas, KQZ certifikon rezultatin e zgjedhjeve të 14 shkurtit ndërsa Parlamenti i ri i Kosovës duhet të konstituohet brenda 30 ditësh.