Kosovë, KQZ: Sot pritet të përmbyllet rinumërimi i votave

Komisioni Qendror i Zgjedhjeve në Kosovë planifikon që procesin e rinumërimit të votave të kandidatëve nga zgjedhjet e 28 dhjetorit ta përmbyllë sot.

“Nga fillimi i këtij procesi, 13 janar, dhe deri në përfundimin e ditës së enjte, 29 janar, janë rinumëruar rreth 95% apo 2.414 nga 2.557 vendvotime. Pra, kanë mbetur për t’u rinumëruar edhe 143 vendvotime që i takojnë 4 komuave të fundit nga ky process, si Prishtinë, Podujevë, Suharekë dhe Shtërpcë. Ky proces, planifikohet të përmbyllet gjatë ditës së sotme,” tha sot zëdhënësi i KQZ-së, Valmir Elezi.

Ndryshe, me përfundimin e procesit të rinumërimit të votave për kandidatë, hapet rruga për shpalljen e rezultateve përfundimtare të zgjedhjeve të 28 dhjetorit të vitit 2025.

Komisioni Qendror i Zgjedhjeve vendosi që në rinumërim të shkojnë të gjitha vendvotimet në nivel vendi pasi u evidentuan manipulime me vota të kandidatëve.