Kosovë, ndërprehet qarkullimi i kamionëve në pikat kufitare me Serbinë

Qendra Kombëtare për Menaxhim Kufitar ka njoftuar për masa të reja që prekin drejtpërdrejt qarkullimin e transportit të mallrave, duke paralajmëruar ndërprerje të lëvizjes së kamionëve në pikat kufitare me Serbinë.

Qendra Kombëtare për Menaxhim Kufitar, QKMK, ka njoftuar se duke filluar nga sot në orën 12:00 do të ketë ndërprerje të qarkullimit të kamionëve në të gjitha pikat e kalimit kufitar ndërmjet Republikës së Kosovës dhe Serbisë.

Sipas njoftimit zyrtar, ky vendim vjen si pasojë e masave të ndërmarra nga Bashkimi Evropian për shoferët e kamionëve të rajonit. Në këtë kuadër, protesta janë paralajmëruar të zhvillohen në territorin e Serbisë dhe pritet të zgjasin deri në shtatë ditë.

QKMK bën të ditur se këto protesta do të kenë ndikim të drejtpërdrejtë në qarkullimin e mjeteve të transportit të mallrave, duke shkaktuar vonesa dhe mbingarkesë të trafikut në zonat kufitare të Kosovës me vendet e rajonit që janë të përfshira në protesta.

Në këtë situatë, Qendra Kombëtare për Menaxhim Kufitar u rekomandon shoqatave të transportit të mallrave, si dhe shoferëve të kamionëve, që të mbajnë kontakte të vazhdueshme me homologët dhe kolegët e tyre në rajon, me qëllim të informimit të saktë dhe në kohë për zhvillimet në terren.

Ndryshe, transportuesit e kamionëve nga nga Serbia, Bosnja dhe Hercegovina, Mali i Zi dhe Maqedonia e Veriut kanë paralajmëruar protesta të përbashkëta duke parkuar mjetet e tyre në pikat kufitare, si reagim ndaj sistemit të ri të hyrje-daljeve në Bashkimin Evropian.

Ata shprehin pakënaqësi për shkak të kufizimit të ditëve të qëndrimit të shoferëve, që sipas tyre po dëmton rëndë sektorin e transportit. Si pasojë, të gjitha pikat kufitare do të mbyllen për qarkullimin e kamionëve me ngarkesë, ndërsa autobusët dhe automjetet personale do të lejohen të kalojnë normalisht.

Sipas Biljana Muratovskës nga Asociacioni i Transportuesve “Makam-Trans”, nga pala maqedonase do të bllokohen pikat kufitare në Deve Bair, Dellçevë, Novo Sellë, Dojran, Bogorodicë, Mexhitli, Qafë Thanë, Bllatë në Dibër dhe Bllacë.

 Transportuesit kërkojnë trajtim të barabartë, duke theksuar se për sektorë të tjerë të transportit ekzistojnë përjashtime, ndërsa për shoferët e kamionëve jo. Sipas tyre, zgjidhja është e thjeshtë: edhe ata të përfshihen në përjashtimet që vlejnë për personelin e transportit ajror, detar dhe hekurudhor.