Kosovë, numërimi i votave të kandidatëve vazhdon, ja kush kryeson

Komisioni Qendror i Zgjedhjeve, njofton se deri më tani është përmbyllur verifikimi i rezultateve të subjekteve politike dhe numërimi i votave të kandidatëve për deputetë në 4 komuna, Hani i Elezit, Shtërpcë, Junik dhe Mamushë, ndërkohë raportohet për numërimin e votave për kandidatë në 672 qendra të votimit ose 26.28 për qind.

Nga votat e numëruara në Lëvizjen Vetëvendosje aktualisht kryeson Albin Kurti me 89.421 vota, pasuar nga Glauk Konjufca me 69.756 vota ndërsa i treti renditet Hekuran Murati me 36.162 vota.

Në Partinë Demokratike të Kosovës aktualisht kryeson Bedri Hamza me 40.599 vota, pasuar nga Arian Tahiri me 19.540 vota, ndërsa i treti renditet Përparim Gruda me 18.127 vota.

E treta, Lidhja Demokratike e Kosovës në krye të renditjes ka turpin e kësaj partie, Lumir Abdixhiku me vetëm 19.333 vota, pasuar nga Himete Bajrami e aftë për të akuzuar por jo edhe për t’u votuar me vetëm 12.570 vota, ndërsa i treti renditet Ukë Rugova me 10.826 vota.

Ndryshe, nga 100 për qind e votave të numëruara të zgjedhjeve parlamentare të 28 dhjetorit, rezulton që e para renditet Lëvizja Vetëvendosje e Albin Kurtit duke shënuar dhe rekordin historik me 433.394 vota ose 49.34 për qind.