Kosovë, numërohen 66.31% e votave me postë, kryeson LVV me 52.72%

Ndërsa ka nisur dhe java e tretë e procesit zgjedhor të 9 shkurtit dhe në Qendrën e Numërimit dhe Rezultateve vazhdon numërimi i votave, sipas të dhënave të publikuara sot nga KQZ, nga 187 vendvotime, janë numëruar 124 prej tyre ose 66.31 për qind e votave me postë.

Lëvizja Vetëvendosje, është e para me 52.72 për qind të votave ose 21.234 vota, e dyta është renditur LDK me 29.80 për qind ose 12.003 vota, e treta PDK-ja me 7.98 për qind, ose 3.213 vota, ndërsa e katërta, bazuar në numërimin e votave nga votimi përmes postës, është renditur AAK me 3. 32 për qind ose 1.338 vota.

Numërimi i votave nga diaspora erdhi pas përfundimit të numërimit të votave nga përfaqësitë diplomatike. Pasi të përfundojë edhe ky proces, do të filloi numërimi i votave me kusht dhe të personave me nevoja të veçanta.

Ndryshe, sipas planit të KQZ-së, shpallja e rezultateve përfundimtare për subjektet politike dhe kandidatët është planifikuar të bëhet deri më 5 mars, ndërkaq, certifikimi i tyre, që ndodh pasi të përfundojnë ankesat eventuale në PZAP dhe Gjykatë Supreme, është planifikuar të bëhet deri më 18 mars.