Kosovë, opozita pa lider përfundon me propozim në rrugë
Filloi si Paketë Emergjente Financiare në vlerë prej mbi 300 milionë eurosh, vazhdoi të komentohet si Rezolutë dhe përfundoi aty ku nisi, në selinë e porpozuesit, Partisë Demokratike të Kosovës, PDK,ndërkohë u mbyllë seanca e jashtëzakonshme e cila me aq pompozitet u proklamua nga hyzmeqari i Hashim Thaçit me shërbim kryetar i LDK, Isa Mustafa. Gjithsesi, fatkeqësia më e madhe e kësaj nisme është përqafimi nga Isa Mustafa, por se ajo u mbrojtë nga një Ish-Ministër i Financave, Bedri Hamza, dhe Guvernator i Bankës që mendohej se e ka pak idenë me ekonominë dhe financat, dhe, rezultoi një fiasko e turpshme. Si Hamza, Veseli, Mustafa dhe opozita e bërë lëmsh nga Presidenti i Kosovës e cila u detyrua të përfundoj në rrugë me propozim në dorë.
Kështu, seanca e jashtëzakonshme ashtu siç nisi përfundoi me dështim pasi Partia Demokratike e Kosovës u tërhoq nga mocioni procedural për votimin e dy projektligjeve në Parlament, pas kundërshtimit që pati nga LDK dhe Kryetarja e Parlamentit, Vjosa Osmani.
Kjo e fundit tha se pas tërheqjes së PDK-së, ligjërisht është e pamundur të vazhdohet me seancën. Sipas Osmanit, në bazë të komenteve, nuk mund të futen në votim propozimet e PDK-së.
Ligji i veçantë, kufizimet e lirive të njeriut
Kryetarja e Parlamentit të Kosovës, Vjosa Osmani, ka bërë të ditur se qysh nesër do të procedojë një draft të ligjit të veçantë për pandeminë, që sipas saj do t’i trajtojë të gjitha kufizimet e lirive të njeriut.
Osmani tha se në mbledhjen e fundit të Kryesisë së Parlamentit, e kanë diskutuar obligimin e Parlamentit që pas aktgjykimit të Kushtetueses të nxjerrë ligj të veçantë, i cili autorizon kufizimin e të drejtave të njeriut.
“Si deputetë të Kuvendit ne e kemi obligim që urgjentisht ta iniciojmë këtë ligj. E dinë anëtarët e kryesisë dhe shefat e grupev e parlamentare që qysh atë ditë i kam njoftuar se ka ekspertë, profesorë të së drejtës kushtetuese që e kanë ofruar ndihmën e tyre që për 24 orë ta bëjnë këtë ligj. Pasi në kryesi nuk ka pasur një konsensus dhe ju e dini që pa e pasur vullnetin e grupeve politike unë kot e thërras seancën, meqë nuk ka pasur një konsensus të tillë unë do ta procedojë një draft qysh nesër, po sipas të gjitha procedurave që janë të parapara në rregullore të Kuvendit dhe Kushtetutën e Kosovës. Pra, si nismë legjislative e hartuar nga ekspertët në përputhje të plotë me aktgjykimin e Gjykatës Kushtetuese, në qoftë se ka vullnet politik për pak ditë vendoset në rend dite të këtij Kuvendi dhe eliminon çdo paqartësi ligjore dhe Kushtetuese,” tha Kryetarja e Parlamentit të Kosovës, Vjosa Osmani.
Ndryshe, Partia Demokratike e Kosovës ka tërhequr rezolutën për Paketën Fiskale Emergjente, pasi sipas tyre nuk ka pajtueshmëri që të futen në rend të ditës dy projektligjet e propozuara nga PDK.
Mbi bazën e kësaj, kryetarja e Kuvendit të Kosovës, Vjosa Osmani e mbylli seancën
