Kosovë-Serbi, 11 vjet të humbura! Tadiç kundërshton Ischingerin…

Ish-presidenti i Serbisë, Boris Tadiç, i është përgjigjur Wolfgang Ischingerit, ish-ambasadorit gjerman, anëtar i Trojkës së famshme faktmbledhëse pas propozimit të Ahtisarit dhe aktualisht njëri ndër njerëzit më me ndikim te kancelarja gjermane, pasi që ky i fundit e kishte mirëpritur takimin mes presidentit Thaçi dhe atij rus Putin.

Në rrjetin social Twitter, Ischinger shkruan se kishte shkuar në Moskë në nëntor 2007 “për të kërkuar mbështetje për një marrëveshje ndërmjet dy presidentëve – për të cilën Thaçi (atëherë kryeministër) dhe Tadiç ishin të gatshëm të pajtoheshin, me mbështetje nga BE dhe SHBA, e Rusia kishte refuzuar atë. Ne i humbëm 11 vjet!”.

Ish-presidenti serb Tadiç, sot i është përgjigjur ambasadorit Ischinger poashtu përmes rrjetit social Twitter.

“I nderuar Wolfgang, kurrë nuk e kam pranuar asnjë marrëveshje me Thaçin. Ne madje nuk kemi pasur asnjë takim dypalësh. Kam qenë i gatshëm që të dëgjoja çfarëdo propozimi racional për të arritur një marrëveshje të qëndrueshme që do të mbronte dinjitetin e të dyja palëve. Fatkeqësisht, kurrë nuk kam dëgjuar diçka të tillë,” shkruan Tadiç në Twitter.

Replikës së Tadiçit iu përgjigj ambasadori Ischinger:

“A po flasim për të njëjtën gjë? Me sa kujtoj, draft marrëveshja ime e tetorit 2007, e bazuar në modelin e traktatit gjermano-gjerman, do të mund të ishte pranuar nëse kryeministri juaj asokohe nuk do ta këshillonte Moskën që të thoshte “jo” – gjë që Moska edhe e bëri. 11 vjet të humbura!”.

Tadiç sërish reagoi duke thënë se ai gjithnjë kishte marrë në konsideratë propozimet e ambasadorit Ischinger, por se, sipas tij, ai asnjëherë nuk kishte thënë se po e pranonte atë propozim.

“Mediat në Serbi e transmetojnë mesazhin tuaj sikur unë e kam pranuar ndonjë marrëveshje të kryer me Thaçin, që gjë thjesht nuk është e vërtetë,” përgjigjet përmes rrjetit social Twitter, Ish-presidenti i Serbisë, Boris Tadiç.