Kosovë-Serbi, Përfaqësuesi i BE: Shkëmbimi i territoreve nuk është në rendin e ditës!
Shkëmbimi i territoreve ndërmjet Kosovës dhe Serbisë nuk është në rendin e ditës. Kështu shpreh Përfaqësuesi i Posaçëm i BE në Dialogun Kosovë-Serbi, Mirosllav Lajçak, në një intervistë për agjencinë austriake të lajmeve APA, duke shtuar se në këtë dialog Bashkimi Evropian dhe Shtetet e Bashkuara duhet të shkojnë “dorë për dore”.
“Ne kemi parë një reagim shumë të fortë negativ për zëvendësimin e territoreve, në Kosovë dhe vendet e tjera të rajonit, si dhe në vendet e BE. Kjo më çon në përfundimin se nuk është në rendin e ditës, as nuk duhet të jetë në rendin e ditës.”
Duke folur rreth deklarimeve të shefit të diplomacisë evropiane Josep Borell se nuk e përjashton një ndryshim të kufijve dhe se marrëveshja dhe përmbajtja e saj janë përgjegjësi e të dy vendeve dhe se BE nuk mund të përcaktojë asgjë, Lajçak tha se Borrell theksoi se BE po synon një marrëveshje të harmonizuar ligjërisht.
“Ne kemi nevojë për një marrëveshje që qetëson situatën,” tha Përfaqësuesi i Posaçëm i BE-së ashtu si dhe shefi i tij Borrell por e pranoi se reagimet ndaj idesë së shkëmbimit të territoreve treguan shumë qartë se kjo do të shkaktonte krejt të kundërtën.
Lajçak nuk ka dashur të komentojë pohimet për një marrëveshje të fshehtë për shkëmbimin e territoreve midis presidentit të Kosovës Hashim Thaçi dhe homologut të tij serb Aleksandar Vuçiç, e cila mbështetet nga SHBA, siç pretendojnë disa.
“Unë nuk jam duke punuar në bazë të spekulimeve,” tha ai duke shtuar se nuk e kishte parë një plan të tillë në asnjë rast.
Përfaqësuesi i Posaçëm i BE në Dialogun Kosovë-Serbi, gjithashtu nuk pranoi të komentoi që Shtetet e Bashkuara, përmes Të dërguarit të Posaçëm të Presidentit të SHBA, Richard Grenell, u përfshinë gjithashtu në rënien e qeverisë së Albin Kurtit siç pretendoi Kryeministri Kurti.
E vetmja gjë që është e rëndësishme, vlerësoi Lajçak, është një qeveri e qëndrueshme që gëzon mbështetje të gjerë nga parlamenti dhe popullata.
“Shtetet e Bashkuara kanë qenë gjithmonë partneri më i rëndësishëm ndërkombëtar i BE-së në Kosovë!”
Mirosllav Lajçak e sheh rolin e BE-së dhe atij personal në konfliktin mes Kosovës dhe Serbisë, kryesisht si ndërmjetës. Ai nuk mendon se ardhja nga një vend që nuk e ka njohur Kosovën është një pengesë madje e sheh atë si një mundësi, por shton se ai nuk përfaqëson Sllovakinë, por BE-në.
Për të qëndruar i besueshëm si aktor, BE duhet të marrë një vendim për liberalizimin e vizave për qytetarët e Kosovës sa më shpejt që të jetë e mundur, por Lajçak nuk ka dashur të përgjigjet se cilat vende nuk po e mbështesin një gjë të tillë.
Përfaqësuesi i Posaçëm i BE në Dialogun Kosovë-Serbi, Mirosllav Lajçak, tha se çështja aktualisht po negociohet dhe ai është absolutisht optimist se një marrëveshje do të arrihet së shpejti. Ndërsa kur u pyet se çfarë rezultati do të donte të shihte në fund të mandatit të tij, ai u shpreh qartë se disa gjëra janë thënë më mirë se sa që janë arritur ndërsa përfundoi:
“Qëllimi është që të kemi një marrëveshje juridikisht detyruese midis dy palëve që sqaron të gjitha çështjet e hapura, se është në përputhje me ligjin ndërkombëtar dhe nga të gjitha palët – politika dhe njerëzit në të dy vendet, rajoni, por edhe të gjitha shtetet anëtare të BE-së të pranohet dhe të njihet. Nuk ka asnjë arsye për të vonuar procesin, por në fund të fundit, cilësia është më e rëndësishme sesa një marrëveshje e shpejtë.”
