Kosovë-Serbi, Vuçiç: Zgjidhje përmes dialogut ose konflikt i mundshëm!

Pas takimit me ambasadorët e vendeve të Kuintit, Presidenti i Serbisë, Aleksandar Vuçiç, tha sot se ishte shprehur që konflikti në Nagorno-Karabak ka treguar shembull se si është një konflikt i ngrirë dhe që kur dikush e shkrin atë, mund të përshkallëzojë një katastrofë të vërtetë.

Beogradi, tha ai, duhet të punojë për arritjen e zgjidhjes përmes kompromisit me Kosovën ndërsa Serbia edhe më tej duhet të forcohet ekonomikisht dhe ushtarakisht që të mund të ruajë vendin e saj në çdo moment nga agresorët potencialë.

“Por, porosia më e rëndësishme është porosia e paqes, dialogut dhe dëshirës që të vazhdojmë bisedimet me Prishtinën dhe ta kuptojmë që zgjidhja më e mirë e mundshme është përmes dialogut. Është më mirë që ta arrijmë më herët sesa vonë. Në të kundërtën mund të na ndodhë ndonjë konflikt,” tha Vuçiç duke cituar ambasadorin amerikan në Beograd, Anthony Godfrey, që sipas tij ka deklaruar se Shtetet e Bashkuara mbesin të përkushtuara për zbatimin e Marrëveshjes së Washingtonit.

“Pavarësisht se si do të përfundojë kjo telenovelë që po e shikojmë!”

Ndryshe, Presidenti Vuçiç dhe kryeministri i Kosovës, Avdullah Hoti, më 4 shtator në Washington, në praninë e presidentit amerikan Donald Trump, kanë nënshkruar Marrëveshjen për normalizimin e marrëdhënieve ekonomike. Si rezultat i kësaj Marrëveshje, në beograd u hap zyra e Korporatës Financiare të Zhvillimit Ndërkombëtar, DFC.

Thirrje për shumë pjesëtarë të pakicave në administratën shtetërore

Presidenti i Serbisë, Aleksandar Vuçiq, i ka dërguar Qeverisë së Serbisë një kërkesë që të ketë më shumë pjesëtarë të pakicave kombëtare në administratën shtetërore.

“Të mos jenë vetëm partnerët tradicionalë, partia e Ishtvan Pastorit, por edhe pjesëtarët e tjerë të pakicave kombëtare – romët, kroatët, boshnjakët. Ka mjaft përfaqësues të shqiptarëve, me të cilët mund të bisedojmë dhe do t’i lutesha ministres (Gordnana) Qomiq (ministre për të Drejtat e Njeriut, të Pakicave dhe Dialogut shoqëror) që të ndikojë në përmirësim edhe më të fuqishëm të pozitës së pjesëtarëve të pakicave kombëtare,” tha Presidenti i Serbisë, Aleksandar Vuçiç, raporton RFE.

Ndryshe, Grupi i Kuintit përbëhet nga Franca, Gjermania, Italia, Mbretëria e Bashkuar dhe Shtetet e Bashkuara