Kosovë, sot KQZ certifikon rezultatin e zgjedhjeve të 9 shkurtit

Komisioni Qendror i Zgjedhjeve, KQZ, e Kosovës ka bërë të ditur se sot do të mbajë mbledhje ku pritet dhe certifikimi i rezultateve përfundimtare të zgjedhjeve të 9 shkurtit.

“Në orën16:00, Komisioni Qendror i Zgjedhjeve do të mbajë mbledhjen e radhës me këtë rend dite,” thuhet në njoftimin e KQZ-së duke bërë publike dhe rendin e ditës.

Ndryshe, Gjykata Supreme e Kosovës i ka refuzuar si të pabaza dy ankesat e fundit lidhur me procesin zgjedhor, duke i hapur rrugë Komisionit Qendror të Zgjedhjeve për certifikim të rezultateve.

“Dy ankesat e pranuara me datë 21 mars 2025, një ankesë nga Lëvizja Vetëvendosje, e ushtruar kundër vendimit të PZAP-se, A.nr.641/2025 dhe një ankesë nga Koalicioni PDAK-LPB, e ushtruar kundër vendimit të PZAP-se, A.nr.639/2025, janë refuzuar si të pabazuara,” ka bërë të ditur zëdhënësja e Gjykatës Supreme, Antigona Lutfiu.

Gjithashtu, Gjykata Supreme përmes zëdhënëses ka bërë të ditur se më 24 mars është refuzuar ankesa e kandidatit për deputet Petrit Hajdari nga Partia Demokratike e Kosovës-PDK, e ushtruar kundër vendimit të PZAP-se, A.636/2025.