Kosovë, ZRRE: Nga 16 gushti bizneset pa kontratë furnizimi shkëputen nga rrjeti
Zyra e Rregullatorit të Energjisë ka bërë të ditur se nga data 16 gusht 2025, të gjithë konsumatorët komercialë që nuk kanë nënshkruar kontratë furnizimi me një nga furnizuesit e licencuar të energjisë elektrike do të shkëputen nga rrjeti energjetik.
Ky vendim vjen pas aprovimit të ankesës së ZRRE-së nga shkalla e dytë e Gjykatës Komerciale, e cila refuzoi kërkesën për shtyrjen e liberalizimit të tregut të energjisë elektrike.
“Zyra e Rregullatorit për Energji, ZRRE, ka pranuar sot nga Gjykata Komerciale – Dhoma Shkalla e Dytë, Aktvendimin lidhur me masën e sigurisë për çështjen e liberalizimit të tregut të energjisë elektrike. Aktvendimi i Gjykata Komerciale – Dhoma Shkalla e Dytë ka Aprovuar ankesën e ZRRE dhe ka ndryshuar pikën IV të Aktgjykimit KA.nr.301/25 të Gjykatës Komerciale – Dhoma Shkalla e Parë, me ç’rast ka refuzuar padinë e paditësit për shtyrjen e liberalizimit të tregut të energjisë elektrike”, thekson ZRRE.
ZRRE thekson se procesi i liberalizimit po zhvillohet në përputhje të plotë me ligjin, në mënyrë transparente dhe të paanshme, dhe ligjshmëria e tij është konfirmuar nga gjykatat kompetente.
“Ashtu siç kemi theksuar edhe më herët, procesi i liberalizimit të tregut të energjisë elektrike është në përputhje të plotë me legjislacionin në fuqi, në mënyrë transparente dhe të paanshme, duke respektuar të gjitha standardet procedurale dhe materiale. Ligjshmëria e këtij procesi po konfirmohet nga gjykatat kompetente, së fundi edhe nga Gjykata Komerciale – Dhoma Shkalla e Dytë, duke vërtetuar se të gjithë hapat janë ndërmarrë në përputhje me ligjet e aplikueshme në Republikën e Kosovës”, thotë tutje ZRRE.
Ky autoriteti i bën thirrje biznesve që ende nuk kanë lidhur kontratë furnizimi të veprojnë menjëherë dhe të zgjedhin një furnizues të licencuar, për të shmangur ndërprerjen e energjisë.
“Sepse nga data e 16.08.2025 konsumatorët komercial të cilët nuk kanë nënshkruar kontratë komerciale me një nga furnizuesit e licencuar do të ndërpriten nga rrjeti energjetik. ZRRE mbetet e përkushtuar për të garantuar një treg të energjisë elektrike të drejtë, funksional dhe konkurrues, në shërbim të konsumatorëve dhe në përputhje me legjislacionin vendor dhe standardet evropiane”, përfundon komunikata e ZRRE-së.
