Kostot e Demokracisë, Yuri Kim: Largoni kriminelët nga lista zgjedhore, transparencë financimeve!
Liderët politikë duhet të mos vënë kriminelë në listë, partitë duhet të bëjnë transparencë për financimet. Ky ishte mesazhi kryesor dhe i qartë Ambasadores së SHBA në Tiranë, Yuri Kim, në konferencën me temë “Kostot e Demokracisë II; Paratë në politikë dhe Integriteti Zgjedhor”, ku Ambasadori i Mbretërisë së Bashkuar, Duncan Norman, e tha qartë se pavarësisht përmirësimeve ndër vite, vullneti i popullit shqiptar ende nuk po respektohet plotësisht.
“Përgjegjësia për të përmirësuar sistemin elektoral nuk bie vetëm tek një person, institucion apo një parti, por tek të gjithë ne. Këshilli politik mori vendime të rëndësishme vitin e kaluar, një hap i rëndësishëm për integrimin në BE. Tani ne po ndjekim procesin e zbatimit nga afër, po ndjekim rrugën e institucioneve për të siguruar që zgjedhjet e ardhshme të jenë të ndershme dhe transparente,” tha Ambasadorja amerikane duke siguruar se po punojnë me partitë politike që të përmbushin detyrimin ligjore për të forcuar besimin e popullit shqiptar duke vendosur në lista njerëz që nuk rrezikojnë demokracinë dhe nuk promovojnë korrupsionin.
“SHBA ka punuar dhe do të punojë për të përmirësuar demokracinë në Shqipëri. Përfaqësuesit në parlament duhet të përfaqësojnë të gjithë shqiptarët. Liderët e partive të largojnë politikanët e korruptuar nga lista. Partitë të bëjnë transparente financimet,” tha Ambasadorja e SHBA në Tiranë, Yuri Kim, duke përfunduar:
“Të kontrollohen mirë kandidatët, populli shqiptar nuk duhet që të votojë për kriminelë. Shqipëria mund të ndërtojë një sistem më të mirë elektoral. Ne inkurajojmë të gjithë partitë, që të kenë transparencë për gjithçka për zgjedhjet e ardhshme.”
Vullneti i popullit shqiptar ende nuk por respektohet!
Ndonëse është detyrim kushtetues, vullneti i popullit shqiptar nuk respektohet ende plotësisht, tha Ambasadori i Mbretërisë së Bashkuar në Shqipëri, Duncan Norman, ndërsa renditi fenomenet tjera negative që kanë vijuar si keqpërdorimi i institucioneve publike, intimidimi i votuesve, aksesi në media i partive të vogla apo dhe blerja e votës.
“Pavarësisht përmirësimeve gjatë viteve, vullneti i popullit shqiptar ende nuk por respektohet plotësisht. Kushtetuta kërkon që vullneti i qytetarëve të respektohet. Fenomene negative kanë vijuar si keqpërdorimi i institucioneve publike, intimidimi i votuesve, aksesi në media i partive të vogla apo dhe blerja e votës. Vazhdon të ketë mungesë transparence sa i përket financimit të partive politike. Zgjedhjet e 2021 do të jenë sfiduese, jetike, një hap i rëndësishëm drejt integrimit europian,” tha Ambasadori Norman duke bërë thirrje për ndryshim:
“Partitë kanë mungesë besimi tek njëra-tjetra ashtu si qytetarët e vendit. Edhe në shumë vende të botës qytetarët po humbasin besimin tek partitë. Kjo duhet të ndryshojë. Një vëzhgim i pavarur është me shumë rëndësi. Ambasada britanike ka një paketë që nxit transparencën dhe besueshmërinë drejt një procesi elektoral më demokratik. Qeveria britanike synon të sigurojë që zgjedhjet e 2021 të jenë më të mirat.”
