KOSTT: Nuk bëhet fjalë për mungesë energjie, vetëm për ngarkesa të mëdha

Pas problemeve të mëdha me furnizimin me energji elektrike në veçanti në Rajonin e Ferizajit, Ministrja e Ekonomisë e Kosovës, Artane Rizvanolli, ka zhvilluar takim me përfaqësues të Operatorit të Sistemit, Transmisionit dhe Tregut, KOSTT, dhe të Kompanisë Kosovare për Distribuim të Energjisë Elektrike, KEDS, ku ka kërkuar që të komunikojnë me qytetarët më shpesh dhe të marrin parasysh ankesat e tyre.

“Unë i përcolla ankesat e të qytetarëve për energji dhe veçanërisht zonat e caktuara që kanë qenë të ndikuara. Nga njëra anë kërkova nga të dy operatorët që të bëjnë maksimumin dhe të sanojnë në masën e mundshme të gjitha lokacionet ku ka probleme, qoftë për shkak të prishjeve ose mbingarkesës. Të kenë komunikim sa më të shpeshtë dhe të qartë me qytetarët për natyrën e shkakun e problemeve dhe për atë çka është duke u bërë. Rajoni i Ferizajt ka më shumë probleme,” tha ministrja Artane Rizvanolli ndërsa kryeshefi ekzekutiv i KOSTT-it, Evetar Zeqiri, pas takimit me ministren Ekonomisë së Kosovës dhe përfaqësuesin e KEDS, tha se sistemi elektroenergjetik është duke u përballur me ngarkesa të mëdha.

KOSTT, tha ai, është duke bërë maksimumin që të operojë me kapacitet që ka por ngarkesat më të mëdha janë në disa komuna të caktuara si Ferizaj, Malisheva e  Fushë Kosova.

“Ne kemi finalizuar ndërtimin e nënstacionit në Fushë Kosovë, i cili është përuruar javën e kaluar. Ky nënstacion e ka zgjidhur problemin e Fushë Kosovës dhe Obiliqit dhe më nuk do të ketë probleme me ngarkesë,” tha Zeqiraj ndërsa për Ferizaj ai tha se janë duke punuar.

“Çështja e Ferizajt është në ditët e fundit të punimeve. Kemi shpresuar që ta përfundojmë deri në fund të vitit, por ngarkesa është shumë e madhe. Kemi tri nënstacione në Ferizaj, çdo nënstacion arrin vlerën deri në 10 milionë euro. Po flasim për investime shumë të mëdha, janë investime komplekse. Si rezultat i ngarkesës së madhe kërkohet reduktim i pjesshëm i ndonjë zone,” tha Evetar Zeqiri duke siguruar se po adresohen të gjitha problemet.

“Jemi në fazat finale të kompletimit të punimeve. Jemi ballafaquar me shumë pengesa ligjore, administrative, pengesa hartat zonale, të pronarëve të tokave. Vendime gjyqësore të padrejta, jashtë çdo procesi që kanë penguar. Autoritetet e rendit lokale s’kanë bashkëpunuar në mënyrë të duhur,” tha kryeshefi ekzekutiv i KOSTT-it, Evetar Zeqiri, duke shtuar se nuk ka pasur mungesë të energjisë por ngarkesat po shkaktojnë probleme dhe kanë qenë të detyruar vetëm në këto zona të ketë reduktime ndërsa përfundoi:

“Problemi është i përkohshëm. Prodhimi është në maksimum, po funksionojmë në katër blloqe. Pra nuk bëhet fjalë për mungesë të energjisë, por ngarkesë.”