KPA: Besnik Muçi shkarkohet nga detyra; Muçi: Vendimi nul!
Kolegji i Posaçëm i Apelimit ka vendosur sot shkarkimin nga detyra të Ish-Prokurorin Besnik Muçi, aktualisht anëtar i Gjykatës Kushtetuese.
Gjatë shqyrtimit, thekson KPA, është konstatuar deklarim i pasaktë dhe i pamjaftueshëm i pasurisë nga ana e Besnik Muçit dhe personit të lidhur me të.
KPA pasi e shqyrtoi çështjen në prani të palëve, pasi u dëgjuan edhe konkluzionet përfundimtare, vlerësoi shkaqet e ankimit për kriteret e kontrollit të pasurisë, trupi gjykues arrin në këto përfundime:
Subjekti gjendet në kushtet e deklarimit të pamjaftueshëm për deklarimin e pasurisë;
Subjekti nuk mund të mbulonte shpenzimet e këtyre viteve dhe gjendet në kushtet e deklarimit të pamjaftueshëm për kriteret e kontrollit të pasurisë;
Pas marrëdhënies me individin A.L që ishte përfshirë në konflikte fizike me të tjerë ku është përdorur edhe armë zjarri, ishte proceduar dhe dënuar nga Gjykata për veprën penale të moskallëzimit të krimit, vendim i prishur nga Apeli i Tiranës duke pushuar çështjen penale në ngarkim të A.L, nga i cili pati privilegjet e përfituara për blerjen e apartamentit.
Rezulton se ai ka cenuar besimin publik në sistemin e drejtësisë.
Përfundimet u vlerësuan të mjaftueshme për të konkluduar mbi kriterin e kontrollit të pasurisë, nuk mund të gëzojë besimin e publikut për të qëndruar në detyrë.
Subjekti i rivlerësimit ka kryer deklarim të pasaktë dhe të pamjaftueshme të pasurisë së tij dhe personave të lidhur me të.
Trupi gjykues vendosi, ndryshimin e vendimit të KPK dhe shkarkimin nga detyra të subjektit të vlerësimit Besnik Muçi, prokuror në fillimin e vlerësimit dhe anëtar i Gjykatës Kushtetuese.
Por një vendim i tillë konsiderohet nul nga vetë Muçi, i cili thotë se në momentin që ka bërë betimin si anëtar i Gjykatës Kushtetuese ky vendim nuk ka më efekt.
“Vendimi nuk afekton funksionin e tij si anëtar i Gjykatës Kushtetuese. Kolegji i Posaçëm i Apelimit nuk mund ti shtrijë kompetencat e veta mbi anëtarët e Gjykatës Kushtetuese të zgjedhur sipas parashikimeve kushtetuese të ndryshuara në vitin 2016.”
Ndryshe, vendimi i KPK që konfirmoi në detyrë Besnik Muçin u ankimua nga Komisioneri Publik. Sipas Komisionerit, subjekti ndodhet në kushtet e mosdeklarimit të saktë të pasurisë, pasi nuk e justifikoi plotësisht atë. Nga krahasimi i deklaratës së vitit 2006 me deklaratën në vetting ka mospërputhje, ndërsa nuk ka dokumentacion të mjaftueshëm për huatë e marra.
