KPA shkarkon prokuroren Antoneta Sevdari. KLP tani…
Kolegji i Posaçëm i Apelimit, KPA, ka vendosur të shkarkoj nga detyra prokuroren Antoneta Sevdari, e cila ndërkohë është bërë anëtare e strukturës më të re të Drejtësisë, Këshillit të Lartë të Prokurorisë, përkundër apelimit që i ishte bërë vendimit të KPK dhe denoncimeve të shumta.
Trupi gjykues i KPA, shkarkoi prokuroren Antoneta Sevdari për mos-justifikim të mjaftueshëm të burimeve financiare të pasurisë që zotëron bashkëshorti i anëtares së KLP.
Ndryshe, prokurorja e kishte kaluar vettingun duke u vlerësuar pozitivisht në të trija kriteret gjatë procesit të zhvilluar ndaj saj në KPK. Ndërkohë komisionari publik bëri ankim në KPA duke kërkuar shkarkimin e Antoneta Sevdarit.
Gjatë procesit në kolegjin e apelimit, vendimi për anëtaren e KLP u shty dy herë dhe në fund, ndonëse rrëzoi kërkesën e komisionarit publik, KPA vendosi shkarkimin e Sevdarit nga detyra.
Pretendimet
Së pari, Komisioneri Publik u shpreh se referuar hetimit për një shtëpi banimi konstatohet se për burimin e ligjshëm të të ardhurave, të deklaruara nga emigracioni i bashkëshortit gjatë viteve 1997-2004, Komisioni ka administruar vetëm tri dokumente të lëshuara nga Instituti Grek i Sigurimeve Shoqërore, të cilat vërtetojnë blerje pullash sigurimi shoqëror për muajt korrik, gusht dhe shtator të vitit 1998. Këto dokumente nuk provojnë nëse ato lidhen me punësimin e bashkëshortit.
Gjithashtu, ato figurojnë vetëm për një periudhë tremujore punësimi dhe jo për periudhën trevjeçare të deklaruar nga subjekti. Pra, duke mos hetuar dhe disponuar dokumente ligjore për pjesën tjetër të të ardhurave. Ndërkohë, nga analiza financiare dhe verifikimi i të ardhurave të ligjshme të prokurores dhe bashkëshortit, Komisioneri Publik konstaton se për periudhën 2000- 2003, në të cilën Sevdari ka deklaruar se ka qarkulluar 3.000.000 lekë, për krijimin e 1/3 të banesës dhe 3.000 deri në 4.000 euro për mobilim, të ardhurat e ligjshme nuk i mbulojnë këto shpenzime të deklaruara.
“Të ardhurat e ligjshme në këtë periudhë, vërtetuar me dokumentacion ligjor provues rezultojnë në shumën 1.869.447 lekë”, tha Komisioneri. Në lidhje me kriterin e pasurisë, Komisioneri Publik konstaton se, megjithëse për subjektin janë depozituar 10 denoncime, hetimi i Komisionit për disa prej tyre ka munguar plotësisht. Në disa raste, pretendimet e denoncuesve paraqesin rrethana, të cilat referojnë se prokurorja shfaq mangësi në kriterin e aftësive profesionale, shkak i cili duhej të detyronte Komisionin të hetonte dhe vlerësonte më tej.
Dhe, gjate seances se fundit, drejtuesi i trupit gjykues të KPA-së bëri të ditur se për prokuroren është bërë një denoncim i ri në datën 5 shkurt nga një shtetas i quajtur Aleksandër Marku.
Ky vendim i KPA tashmë vë në pikëpyetje funksionimin e KLP-së dhe drejtësisë në tërësi, i cili ende pa filluar mirë punë mbetet pa një anëtare.
