KPK dyshime për pasurinë e kreut të Kushtetuese/ Çfarë pritet për Bashkim Dedjen…

Kryetari i Gjykatës Kushtetuese, Bashkim Dedja, duket se do e ketë të vështirë të kalojë sitën e Vetingut, pas dyshimeve të shprehura në relacionin e KPK-së lidhur me pasurinë e tij.

Në seancën e parë të zhvilluar sot ku gjyqtari nuk ishte i pranishëm, por përfaqesohej nga avokati Maks Haxhia, Xhensila Pine paraqiti relacionin lidhur me kontrollin e ushtruar.

“Kemi kryer hetim për deklarimet e pasurisë. Apartament banimi 146 m katror, garazh me vlerë 118 mijë euro.

Burimi: kredi bankare 120 mijë euro me afat 20 vjet. Hua pa interes 25 mijë euro. Të ardhurat e tij, 35 mijë euro bashkë me bashkëshorten. Vlera e apartamentit është 180 mijë euro”.

Dedja ka bërë deklarime konfuze në dy deklarata noteriale. 25 mijë euroshin fillimisht ka deklaruar se ia ka marrë kunatit, pastaj babait të kunatit. Edhe 15 mijë euro hua që i ka marrë vellait është e dyshimtë. Nga dokumentacioni i dorëzuar rezultojnë mangësi.

Sipas KPK, vëllai i gjyqtarit, në kohën kur i ka dhënë 15 mijë euro borxh, i ka blerë Dedjes një apartament 40 mijë euro me kredi.

Probleme të vërejtura për gjyqtarin Dedja ka edhe me një apartament tjetër në Tirane, blerë në 1997 me vëllanë. Sipas KPK, gjyqtari nuk ka pasur mundësi ta blejë në atë vit.

KPK tha se “Bashkim Dedja ndryshoi deklarimet për këtë apartament, fillimisht ka thënë se është i veti dhe pastaj që e ka blerë me vëllain”.

Në lidhje me një apartament tjetër në Golem që e përdor gjyqtari del që është në emër të vëllait tjetër që jeton në Dibër ka probleme gjithashtu. Nga hetimi rezulton se kontrata e OSSHE për apartamentin është lidhur në emër të tij. As vëllai edhe as bashkimi s’kanë dhënë dot shpjegime për këtë gjë”.

Avokati Maks Haxhia u shpreh në seancë se ILDKPKI ka thënë se deklarimet e Dedjes janë të sakta, s’ka fshehur pasurinë, s’ka deklarim të rreme ka burime të ligjshme. Vëllezërit e Bashkimit kanë punuar në të zezë prej vitesh në Greqi e vende të tjera dhe të ardhurat e tyre s’janë të deklaruara.

“Në vitet `90 familjet shqiptare janë mbajtur me të ardhurat e emigrantëve. Janë para të pastra. Po të ishin të pista s’do kishin hyrë në sistem banker”, i është drejtuar përfaqësueses së ONM, avokati.