KPK, shkarkohet kryetarja e Gjykatës së Gjirokastrës

Komisioni i Pavarur i Kualifikimit, KPK, shkarkoi Kryetaren e Gjykatës së Gjirokastrës, Albina Spaha.

Trupa gjykuese e përbërë nga Xhensila Pine kryesuese, Genta Tafa (Bungo) anëtare dhe Pamela Qirko relatori, pas hetimit në të tri kriteret, sot vendosi të shkarkoj Albina Spahajn pasi gjatë hetimit administrativ gjete probleme në kriterin e pasurisë.

Gjatë seancës dëgjimore Spaha u përball me një sërë dyshimesh mbi burimin e ligjshëm të pasurive të saj. Sipas relatores ajo nuk kishte burime të ligjshme për të justifikuar blerjen e një apartamenti në Tiranë dhe kursimet ndër vite. KPK po ashtu gjeti disa shuma në llogari bankare që sipas relatores nuk ishin deklaruar dhe nga analiza financiare rezultoi një bilanc negativ prej 6.3 milion lekësh.

Spaha u mbrojt duke pranuar si pakujdesi mosdeklarimet. Po ashtu ajo kërkoi që të përfshiheshin në analizë të ardhurat e bashkëshortit sipas asaj që ajo kishte deklaruar.

Në këtë pikë Albina Spaha kishte arsyetime të ngjashme me kolegët duke fajësuar kompanitë e ndërtimit që kishin punësuar të shoqin dhe nuk kishin paguar sigurime dhe tatime për rroga të plota.

Por meqë nuk quhet Donika Prela, ajo u shkarkua nga KPK.

KPK nuk u shpreh për 5 denoncime që kishte marrë por tha se do i shpjegonte në vendim.

Ndryshe, Albina Spaha e ka nisur karrierën në sistemin gjyqësor në vitin 1998. Ajo ka punuar fillimisht si gjyqtare në Gjykatën e Tepelenës dhe në vitin 2008 është emëruar në Gjykatën e Rrethit Gjyqësor Gjirokastër.

Në tetor 2016, Albina Spaha u komandua kryetare e Gjykatës së Gjirokastrës pas shkarkimit të Guximtar Boçit, i cili u akuza për një skandal seksual, për të cilin gjykata e nxorri të pafajshëm.