KPK shkarkon prokurorin e Vlorës, Xhemal Saliaj

Komisioni i Pavarur i Kualifikimit, KPK, sot ka shkarkuar prokurorin Xhemal Saliaj, pas problemeve në kriterin e pasurisë dhe profesionalizmin.

Pas shqyrtimit të dokumentacionit dhe zhvillimit të seancës dëgjimore në datën 4 tetor, KPK mori sot vendimin për prokurorin në Prokurorinë pranë Gjykatës së Shkallës së Parë të Juridiksionit të Përgjithshëm, Vlorë, Xhemal Saliaj.

Vendimi, i arsyetuar me shkrim, nga trupi gjykues i kryesuar nga Alma Faskaj, Pamela Qirko relatore, Xhensila Pine anëtare do t’i njoftohet subjektit të rivlerësimit, Komisionerit Publik dhe vëzhguesve ndërkombëtarë brenda 30 ditëve. Ky vendim, mund të ankimohet në Kolegjin e Posaçëm të Apelimit nga subjekti i rivlerësimit dhe Komisionerit Publik 15 ditë nga data e njoftimit të vendimit të Komisionit.

Xhemal Saliaj e ka filluar karrierën në sistemin e drejtësisë në vitin 2003 si prokuror në Prokurorinë e Beratit, ku ka ushtruar dhe funksionin e drejtuesit. Prej vitit 2013, ai e ushtron detyrën në Prokurorinë e Rrethit Vlorë aktualisht Prokurorinë pranë Gjykatës së Shkallës së Parë të Juridiksionit të Përgjithshëm.