KPK shkarkon prokurorin Ervin Karanxha, pas debateve avokatët nxirren jashtë nga garda

Komisioni i Pavarur i Kualifikimit ka shkarkuar nga detyra prokurorin Ervin Karanxha. KPK ka shpallur vendimin pas një seance me debate ku avokatët e tij janë nxjerrë jashtë nga efektivët e Gardës së Republikës.

Seanca e parë dëgjimore në KPK u shty nga prokurori Karanxha për arsye shëndetësore. Ndërkaq në seancën e kaluar, prokurori dhe avokatët e tij kërkuan përjashtimin e gjyqtarit.

Ndërkohë që sot prokurori me gjithë avokatët janë paraqitur në seancë, për të cilën pretendonin se do të ishte dëgjimore dhe jo për shpalljen e vendimit nga KPK. Kjo gjë ka sjellë debate dhe për këtë arsye avokatët janë nxjerrë jashtë, ndërsa më pas trupa gjykuese ka shpallur vendimin duke e përjashtuar nga sistemi i drejtësisë.

Trupa gjykuese përbëhej nga Etleda Çiftja, Valbona Sanxhaktari dhe Pamela Qirko.

Ndryshe, Ervin Karanxha ka përfunduar studimet në Shkollën e Magjistraturës në vitin 2003 dhe u emërua prokuror në Prokurorinë e Tiranës, ku ushtronte funksionin prej gati dy dekadash.

Më herët KPK ka shkarkuar dhe bashkëshorten e tij Bernina Kondi, gjyqtare në Gjykatën Administrative të Apelit Tiranë.

Në deklarimin për herë të parë në vitin 2003, prokurori Ervin Karanxha deklaron pasuri prej 434 mijë lekësh, ndërsa në fund të vitit 2017, pasuria familjare kap vlerën e 19.8 milionë lekëve.