KPK shpall vendimet për dy anëtarë të Gjykatës së Lartë/ Kalon Bici, ngel Broci

KPK ka shpallur sot vendimet për dy anëtarët e Gjykatës së Lartë, Mehdi Bici dhe Artan Broci. Referuar vendimeve, KPK ka vendosur që Bici të rikonfirmohet në detyrë, ndërsa për kolegun e tij Broci vendimi ka qenë negativ.

Në rastin e Bicit, KPK ngriti si problem ndërtesën shumëkatëshe të ndërtuar paleje, por të legalizuar më pas. Bici ka dhënë sqarimet përkatëse që duket se bindën KPK për të rikonfirmuar anëtarin e Gjykatës së Lartë në detyrë.

Ndërkohë në rastin e Brocit, KPK ka konkluduar se janë konstatuar mospërputhje të deklarimeve nga ana e subjektit.
Komisioni relatoi më tej, se subjekti i është shmangur pagesës së taksave për qiranë e një ambienti në kryeqytet.

Njeriu që ushtron detyrën e gjykatësit prej 22 vitesh, dhe është ngritur në majën e sistemit, i rrëzoi gjetjet e Komisionit.

Broci i kujtoi Komisionit se me rezultatet e hetimit nuk është njohur për një kohë të gjatë.

“Materialet mu vunë në dispozicion vetëm pas kërkesës time, duke mos më dhënë mundësinë për një mbrojtje efektive”, theksoi ai.