KQZ certifikon listën e votuesve për raundin e dytë
Komisioni Qendror i Zgjedhjeve i Kosovës në mbledhjen e 70-të për këtë vit mori mori vendim për miratimin e raportit të Listës Votuese për raundin e dytë të zgjedhjeve për Kryetarë të Komunave, i cili do të mbahet më 9 Nëntor në 18 komuna.
Kështu, sipas KQZ-së, zgjedhjet për kryetar do të mbahen në Gjakovë, Gjilan, Dragash, Kaçanik, Klinë, Fushë Kosovë, Mitrovicë e Jugut, Obiliq, Rahovec, Pejë, Prishtinë, Prizren, Suharekë, Viti, Vushtrri, Junik, Mamushë dhe Kllokot.
“Sipas kësaj liste, numri i përgjithshëm i qytetarëve me të drejtë vote në raundin e dytë të zgjedhjeve në në këto 18 komuna është 1.346.397 votues. Ky numër, në krahasim me raundin e parë të Zgjedhjeve Lokale të mbajtura më 12 tetor 2025, është më i lartë për 543 votue,” ka bërë të ditur KQZ.
Po ashtu, KQZ njoftoi edhe për numrin e votuesve me të drejtë vote me postë.
“Sipas të dhënave nga Lista Votuese, numri i qytetarëve me të drejtë vote në vendvotimet e këtyre komunave është 1.316.672 votues, ndërkaq numri i qytetarëve të regjistruar për të votuar me postë nga jashtë Kosovës dhe që i takojnë këtyre komunave është 29,725 votues”, thuhet në njoftim.
Në listë, sipas KQZ-së janë përfshirë edhe personat që nga data 13 tetor deri më 9 nëntor 2025 arrijnë moshën e votimit, ndërkaq janë larguar personat që nga shtatori i këtij viti kanë hequr dorë nga shtetësia e Kosovës apo që kanë ndërruar jetë.
“Raundi i dytë i zgjedhjeve do të organizohet në 525 Qendra të Votimit me gjithsej 1.648 vendvotime, prej të cilave 507 Qendra të Votimit për votimin e rregullt me 1.628 vendvotime dhe 18 Qendra të Votimit për votimin me kusht me gjithsej 20 vendvotime”, thuhet në njoftimin e Komisioni Qendror të Zgjedhjeve.
Sipas vendimit të KQZ-së, do të shtypen 1.158.015 fletëvotime apo rreth 16 për qind më pak se numri i përgjithshëm i qytetarëve me të drejtë vote në këtë raund, thekson KQZ duke sqaruar në fund:
“Në këtë numër përfshihen fletëvotimet për vendvotimet e rregullta, votimin me kusht, Votimin e Personave me Nevoja të Veçanta, fletëvotimet rezervë dhe për votimin me postë.”
