KQZ: Janë refuzuar 6.800 zarfa me fletëvotime nga diaspora

Skanimi i listës përfundimtare të votuesve, si dhe futja e të dhënave nga formularët e rezultateve të kandidatëve dhe subjekteve politike, pothuajse janë në fund në Qendrën e Numrimit dhe Rezultateve. Kështu u shpreh zëdhënësi i KQZ, Valmir Elezi, i cili ka shtuar se shërbimi votues i Komisionit Qendror të Zgjedhjeve është duke vijuar me procesin e vlerësimit të rreth 43.500 pakove të supozuara me fletëvotime dhe selektimin e tyre, të cilat i kemi pranuar gjatë periudhës së votimit përmes postës.

“Ky proces verifikimi do të na ndihmojë që të japim përgjigje se sa është numri i saktë i fletëvotimeve nga jashtë vendit. Deri më tani janë trajtuar një pjesë e këtyre pakove dhe pas procesit të vlerësimit janë aprovuar më shumë se 16 mijë zarfe me fletëvotime, ndërsa janë refuzuar 6.800 të tjera. Arsyet e refuzimit të tyre janë nga më të ndryshme. Pjesa më e madhe e tyre, më shumë se 5.000, janë refuzuar për shkak se janë dërguar nga persona që nuk janë të regjistruar si votues jashtë Kosovës dhe për shkak se janë dërguar nga persona që janë refuzuar në periudhën e aplikimit,” tha zëdhënësi i KQZ, Valmir Elezi, duke përfunduar:

“Arsyet tjera se përse nuk janë aprovuar kanë të bëjnë me faktet se ato janë dërguar nga votues të paidentifikuar (votim grupor); se në pakon që e kanë dërguar kanë bashkangjitur dokumente jo-valide; dhe se kanë dërguar fletëvotime më shumë se dy herë.”