KQZ shpall rezultatin përfundimtar të zgjedhjeve
Komisioni Qendror i Zgjedhjeve, KQZ, ka shpallur sot rezultatin përfundimtar të zgjedhjeve të 6 Tetorit në Kosovë, ku Lëvizja Vetëvendosje del e para me 32 deputetë, pasuar nga Lidhja Demokratike e Kosovës me 29 deputetë, Partia Demokratike e Kosovës 25 dhe koalicioni AAK-PSD 14 deputetë.
Nga këto zgjedhje Nisma Socialdemokrate nuk ka arritur të kalojë pragun për t’u bërë pjesë e Kuvendit të Kosovës.
Kryetarja e KQZ-së Valdete Daka bëri të ditur që partitë dhe kandidatët kanë të drejtë 24 orë të ankohen në Panelin Zgjedhor për ankesa dhe Parashtresa.
Daka: Ky është rezultati përfundimtar i zgjedhjeve të 6 tetorit
“Lëvizja Vetëvendosje ka fituar gjithsej 220 mijë e 811 vota, apo shprehur në përqindje 26.159%, Lidhja Demokratike e Kosovës ka fituar 206 mijë e 458 vota apo 24.458%, Partia Demokratike e Kosovës ka 178 mijë e 645 vota apo 21.163%, AAK-PSD koalicioni 100% Kosovë ka 96 mijë e 883 vota apo 11.477%, Srpska Lista ka 57 mijë e 15 vota apo 6.754%, Nisma Socialdemokrate- Aleanca Kosova e Re- Partia e Drejtësisë ka 42 mijë e 72 vota apo 4.984%,” bëri të ditur Daka.
Në legjislaturën e shtatë të Parlamentit të Kosovës, Lista Serbe do t’i ketë 10 deputetë, koalicioni VAKAT 2 deputetë, Kosova Demokratik turk Partisi 2 deputetë, Partia Liberale Egjiptiane 1 deputet, Nova Demokratsska Stranka 1 deputet, Partia e Ashkalinjve për Integrim 1 deputet, Iniciativa e re Demokratike e Kosovës 1 deputet, Jedinstvena Goranska Partija 1 deputet, dhe Partia Rome e Bashkuar e Kosovës 1 deputet.
Shpallja e rezultateve përfundimtare vjen pas përfundimit të të gjitha procedurave në vendvotime më 6 tetor dhe pas ditës së zgjedhjeve në Qendrën e Numërimit dhe Rezultateve ku janë numëruar votat me postë, votat e personave me nevoja të veçanta, votat me kusht dhe janë rinumëruar rreth 850 vendvotime.
Kryetarja e KQZ-së Vadete Daka tha se ky publikim u bë pasi u konfirmua se Paneli Zgjedhor për Ankesa dhe Parashtresa dhe Gjykata Supreme se nuk kanë ndonjë çështje për të shqyrtuar dhe vendosur.
Në zgjedhjet e 6 tetorit ku kanë qenë 44.72% pjesëmarrës në votime, kandidatët për Kryeministër kanë marrë: Kandidati i Vetëvendosjes, Albin Kurti 183.868 vota, kandidatja e LDK-së për kryeministre Vjosa Osmani 176.188 vota, kandidati i PDK-së, Kadri Veseli 146.763 vota, kandidati i AAK-PSD-së Ramush Haradinaj 75.917 dhe kandidati i NISMA-AKR-së, Fatmir Limaj 26.014 vota.
Ndryshe, sipas rezultatit zyrtar, Lëvizja Vetëvendosje dhe Lidhje Demokratike e Kosovës që vazhdojnë negociatat për krijimin e qeverisë, së bashku kanë shumicën prej 61 deputetëve, shumicë e cila nuk është e varur nga Lista Srpska, pra nga Aleksandar Vuçiç.
