Kremlini: Nuk ka asgjë premtuese nga bisedimet me Ukrainën

Kremlini ka minimizuar shpresat se është arritur përparim pas bisedimeve të paqes midis delegacioneve ruse dhe ukrainase që u mbajtën në Stamboll një ditë më parë.

“Ne nuk mund të themi se ka pasur diçka shumë premtuese apo ndonjë përparim”, tha zëdhënësi i Kremlinit, Dmitry Peskov duke shtuar:

“Ka ende shumë punë për t’u bërë”.

Ai shtoi se Moska e konsideron pozitive faktin që Kievi ka filluar që t’i shkruajë kërkesat e saj.

“Ne me kujdes po shmangim deklarimet për çështjet që janë diskutuar në bisedime, sepse ne besojmë se negociatat duhet të bëhen në heshtje”, tha Peskov.

Turqia, si nikoqire e raundit të bisedimeve të mbajtura në Stamboll, tha se raundi i bisedimeve ishte me më së shumti përparim. Ndërkaq, presidenti ukrainas, Volodymyr Zelensky, ka thënë se sinjalet nga bisedimet për paqe, mund të konsiderohen pozitive, mirëpo ka shtuar se ato nuk kanë ndalur shpërthimet nga ana e Rusisë.

Në këtë raund bisedimesh, Ukraina paraqiti propozimet e saj për paqe, që përfshinin miratimin e një statusi të neutralitetit për mosanëtarësim në aleanca ushtarake në këmbim të garancive të sigurisë. Ndërkaq, Moska tha se do të zvogëlojë sulmet në Kiev dhe Çernihiv.

Megjithatë, ky zotim i Moskës, raporton RFE, është pritur me skepticizëm nga Ukraina dhe Perëndimi.

Rusia ka nisur pushtimin e paprovokuar të Ukrainës më 24 shkurt. Që atëherë, palët kanë mbajtur një sërë rundesh të bisedimeve në Bjellorusi, Turqi, por edhe përmes platformave online.