Kreu i ri i SPAK, Kryeministri: Procesi foli vetë! PD: Proces i njollosur që në nisje!
Pas zgjedhjes së kreut të ri të Prokurorisë së Posaçme, Altin Dumani, foli dhe politika! Për Kryeministrin dhe kreun e PS, Edi Rama, procesi i zgjedhjes së drejtuesit të ri të SPAK foli vetë dhe të gjitha thashethemet për kapjen e skapjen e SPAK-ut nga regjimi i mori era! Por, pikërisht për procesin e zgjedhjes së kreut të SPAK opozita ka vërejtje, dhe duke e cilësuar SPAK-un si një seksion i Partisë Socialiste, Partia Demokratike thekson se procesi u njollos që në nisje të saj dhe si i tillë është i pabesueshëm.
“Procesi i zgjedhjes së drejtuesit të ri të SPAK foli vetë për të gjithë ata që duan të dëgjojnë dhe të gjitha thashethemet e katundit politik e mediatik për kapjen e skapjen e SPAK-ut nga regjimi i mori era! Urime drejtuesit të ri dhe fjalën le ta marrë puna me rezultate konkrete!” shprehet Edi Rama ndërkohë edhe Partia Demokratike foli pikërisht për procesin e zgjedhjes së kreut të ri të SPAK por sipas PD ai u njollos që në nisje të saj dhe si i tillë është i pabesueshëm.
“Procesi i zgjedhjes së drejtuesit të ri të SPAK u njollos që në nisje të saj dhe si i tillë është i pabesueshëm. Përplasja për drejtuesin e SPAK mes Yuri Kim dhe Edi Ramës nuk është shenjë se drejtësia është e pavarur, por se ajo është kapur,” shprehet Partia Demokratike duke shtuar se me këtë akt SPAK dëshmoi se po përdoret në mënyrë antiligjore, anikushtetuese për gjah ndaj opozitës dhe shënon kapjen dhe dështimin e plotë të reformës sorosiane të drejtësisë në Shqipëri.
Reagimi i PD:
Procesi i zgjedhjes së drejtuesit të ri të SPAK u njollos që në nisje të saj dhe si i tillë është i pabesueshëm. Përplasja për drejtuesin e SPAK mes Yuri Kim dhe Edi Ramës nuk është shenjë se drejtësia është e pavarur, por se ajo është kapur.
SPAK ka patur mjaftueshëm kohë për t’i dhënë prova publikut të kundërtën duke konsumuar mandatin e një drejtuesi.
Prej krijimit të saj SPAK ka patur në dorë dhjetëra skandale, të cilat ose janë hetuar nga bishti ose nuk janë prekur fare.
Një ‘pallat drejtësie’ në korridoret e të cilit shkon për të bërë ekskursione dhe për të dhënë direktiva kryeministri dhe një ambasadore që bën rolin e guvernatores, nuk është as i pavarur, as i lirë dhe as i ndarë nga pushteti ekzekutiv, siç e kërkon një demokraci normale dhe funksionale.
Me këto fakte të pakundërshtueshme, SPAK është thjeshtë një seksion i Partisë Socialiste.
Kujtojmë se SPAK nisi punën para 2 vitesh duke shpallur moskompetencën për dosjet famekeqe të blerjes së votave nga qeveritarët e lidhur me krimin ato 184 dhe 339 të cilat më pas ia përcolli Prokurorisë së Dibrës. SPAK nuk hetoi krimin zgjedhor, i cili ne 9 vitet e fundit ka përcaktuar strukturën e shtetit.
Me këtë akt SPAK dëshmoi se është vetëm një bisht i i diskretituar i qeverisë. SPAK po përdoret në mënyrë antiligjore, anikushtetuese për gjah ndaj opozitës dhe shënon kapjen dhe dështimin e plotë të reformës sorosiane të drejtësisë në Shqipëri.
