Kreu i ushtrisë serbe: Situata në Kosovë është shumë komplekse…
Shefi i shtabit të përgjithshëm të ushtrisë serbe, Millan Mojsilloviç, tha se situata në Kosovë është shumë komplekse, porse Serbia, tash për tash, nuk po e shqyrton mundësinë e reagimit ushtarak.
“Gjendja e sigurisë është e qëndrueshme, por, në bazë të të gjithë parametrave, është shumë e paparashikueshme”, tha Mojsilloviç për Televizionin Publik të Serbisë, RTS, duke e shtuar se situata në Kosovë është plot me tensione dhe lëvizje të njëanshme, raporton RFE .
Ushtria serbe, tha ai, është në kontakt të vazhdueshëm me njësitë e KFOR-it – misionin paqeruajtës të NATO-s në Kosovë.
Mojsilloviç tha se ushtria serbe po e monitoron situatën në terren dhe e përjashtoi, siç tha, përdorimin e forcës ushtarake.
“Jeni dëshmitarë se si presidenti dhe Qeveria e Serbisë janë të përkushtuar për një gjendje paqësore dhe zgjidhje të situatës në Kosovë. Opsioni i reagimit ushtarak është përjashtuar, nuk është duke u konsideruar tash për tash,” tha Mojsilloviç.
Kosova e ka shpallur pavarësinë e saj në vitin 2008 dhe, në dhjetor të vitit të kaluar, ka marrë vendim për transformimin e forcës së saj të sigurisë në ushtri.
