Krim jo vetëm në politikë/ Pasi transferon prokurorët, kryeprokurorja kërkon truproje…

Opozita flet për krimin në politikë por situata dje në prokurori dëshmon se gjendja në Shqipëri është shumë më alarmante.

Pas një situate të paprecedentë në Prokurorinë e Krimeve të Rënda, ku Drejtori i policisë së shtetit vizitoi në mënyrë të beftë ambientet e prokurorisë së Krimeve të Rënda jashtë orarit zyrtar, mësohet se një nga prokuroret e transferuara në Pukë është konfliktuar me kryeprokuroren e Krimeve të Rënda, Donika Prela, e cila ka thirrur më pas policinë. Pritet të ketë referime në prokurori për goditje për shkak të detyrës, ndërkohë TCH raporton se Donika Prela ka kërkuar truproja dhe aktualisht në zyrën e saj gjenden dy truproja.

Në orët në vijim pritet të ketë një deklaratë nga Prokuroria e Krimeve të Rënda për këtë situatë të paprecedentë. Nuk ka pasur asnjëherë raste të tilla, duke përjashtuar vitin 1992, një kundërshtim të tillë ndaj eprorit.

Ndërkohë Prokuroria e Krimeve të Rënda ka bërë të ditur se është caktuar grupi i prokurorëve që do të përfaqësojnë në gjykim çështjen “Shullazi”. Kryeprokurorja e Krimeve të Rënda, Donika Prela dhe Gentian Osmani janë paraqitur vullnetarisht, por mbetet ende e paqartë se kush do të jenë dy emrat e tjerë që do të jenë pjesë e kë tij grupi.