Krimi elektoral/ SPAK mashtron BE-në, “harron” Gjushin me shokë, arreston vetëm…

Mëngjesi i sotëm ka nisur me zbatimin e njërit prej kushteve të rëndësimishme të Bashkimit Evropian për hapjen e negociatave me Shqipërinë: Dënimin e krimit elektoral! Struktura e Posaçme kundër Krimit dhe Korrupsionit, SPAK, ka lëshuar 22 urdhër arreste në kuadër të Dosjes së shumëpërfolur 339.

Por, ndonëse SPAK është një strukturë e re me të cilën është menduar të luftohet krimi dhe korrupsioni, sot u dëshmua se është një kopje e shëmtuar e Prokruris së Krimeve të Rënda. Deri sa kjo e fundit gjithmonë ka arrestuar rojet e parcelave të drogës dhe shoferët e kamionëve duke mos arritur për 7 vjet të çon para drejtësisë qoftë edhe një boss të vetëm nga Tirana ndërsa dështoi me sukses duke shkatërruar dëshmi edhe me Ministrin e Brendshëm, Saimir Tahiri, sot historia u përsërit. Arrestohen 22 persona që kanë kryer veprën penale “Votimi më shumë se një herë ose pa u identifikuar” në zgjedhjet lokale të Durrësit, prej të cilëve 11 kanë përfunduar në pranga, 8 në arrest shtëpie dhe 3 të tjerë po hetohen në gjendje të lirë ndërsa ata që u dëgjuan në përgjimet e BILD se japin urdhëra, e që ishin siguruar nga prokuroria, janë të lirë.

Ndryshe, Dosja 339 është pjesë e hetimeve që tronditën situatën politike pasi mes të përgjuarve të disa grupeve kriminale në trafikun e lëndëve narkotike, kanë dalë edhe emrat e disa politikanëve për shitblerjen e votave. Dosja 339 ka 24 të pandehur, mes të cilëve Avdylajt e Shijakut dhe të akuzuarit për laboratorin e drogës në Brenog të Hasit, të akuzuar për disa vepra penale, nga trafiku i lëndëve narkotike, grupi kriminal dhe korrupsioni.

Në kuadër të kësaj dosje është marrë në pyetje edhe Ish- Kryetari i Bashkisë Durrës, Vangjush Dako së bashku me zyrtarë të tjerë që kanë bërë fushatën në qytetin bregdetar. Kryebashkiaku i Durrësit është pyetur në cilësinë e personit që ka dijeni, ndërsa nuk kanë dalë detaje nga dëshmia e tij. Përgjimet e zbardhura ku bisedonte me Avdylajt bënë që Vangjush Dako vendosi të mos futet në garë më 30 Qershor.

Dokumenti i plotë:

Nga aktet e administruara në funksion të hetimit të procedimit penal nr.29 të vitit 2019 (339 të vitit 2016) është konfirmuar gjithashtu që gjatë zgjedhjeve lokale të 2017 se:

Komisionerët zgjedhorë të Qëndrës së Votimit nr.1508 0, adresa e QV “Shetel”, shtetasit Shpëtim Stafa, Elidon Stafa, Ramiz Tuda, Fredi Marku, Dalvis Biba, Emilian Tuda, Redi Hysa kanë lejuar me dashje persona të tjerë të cilët janë paraqitur para tyre dhe kanë votuar në emër të votuesve të tjerë. Është provuar se në këtë qendër votimi është votuar për 22 persona të tjerë, duke shfrytëzuar faktin që ndodheshin jashtë shtetit. Në këtë rast komisionerët zgjedhorë kanë kryer veprën penale “Votimi më shumë se një herë ose pa u identifikuar”.

Komisionerët zgjedhorë të Qëndrës së Votimit nr.1335 adresa e QV, “Rubjek shkolla 9-vjeçare”, shtetasit Bashkim Allushi, Jakup Bregu, Altin Lala, Kasem Lala, Kujtim Uruçi, Zyhra Lala, Qemal Domi, kanë lejuar me dashje persona të tjerë të cilët janë paraqitur para tyre dhe kanë votuar në emër të votuesve të tjerë. Është provuar se në këtë qendër votimi është votuar për 7 persona të tjerë, duke shfrytëzuar faktin që ndodheshin jashtë shtetit. Në këtë rast komisionerët zgjedhorë kanë kryer veprën penale “Votimi më shumë se një herë ose pa u identifikuar”.

Komisionerët zgjedhorë të Qëndrës së Votimit nr.1336 adresa e QV, “Rubjek shkolla 9-vjeçare”, shtetasit Besim Bregu, Indrit Bici, Mehdi Lala, Agim Lala, Oriada Lala, Bujar Sula, Qazim Lala kanë lejuar me dashje persona të tjerë të cilët janë paraqitur para tyre dhe kanë votuar në emër të votuesve të tjerë. Është provuar se në këtë qendër votimi është votuar për 23 persona të tjerë, duke shfrytëzuar faktin që ndodheshin jashtë shtetit. Në këtë rast komisionerët zgjedhorë kanë kryer veprën penale “Votimi më shumë se një herë ose pa u identifikuar”.

Ndërsa në këtë episod shtetasi Armelin Zela ka votuar në emër të personave të tjerë duke konsumuar veprën penale “Votimi më shumë se një herë ose pa u identifikuar”.

Bazuar në provat e administruara nga Gjykata e Posaçme ër Korrupsionin dhe Krimin e Organizuar u caktuan masat e sigurimit personal për 22 shtetas të cilat janë ekzekutuar nga policia gjyqësore dhe konkretisht “arrest me burg” për 11 shtetas, “arrest shtëpie” për 8 shtetas dhe “detyrim paraqitje” për 3 shtetas.