Krimi komunist vazhdon, Të përndjekurit Antikomunistë: Po sabotohet gjetja e trupave të të zhdukurve nga diktatura!

Shoqata Antikomuniste e të Përndjekurve Politikë të Shqipërisë ka reaguar sot ndaj përpjekjeve të individëve që i kanë shërbyer diktaturës komuniste për të penguar e sabotuar gjetjen e trupave të të zhdukurve nga diktatura komuniste, duke i konsideruar  vazhdimësi të vrasjeve dhe zhdukjeve të njerëzve tanë nga komunistet.

“Ka kohë që po synohet ndërtimi i një varreze false (pa eshtra) të të zhdukurve nga diktatura komuniste, të pushkatuar, të vrarë në kufi, të vdekur nga torturat në hetuesi e burgje, trupat e të cilëve nuk iu janë dhënë familjarëve. Qëllimi është që të sabotohet e të pengohet procesi i gjetjes së tyre, një detyrim ligjor kombëtar dhe ndërkombëtar i qeverisë dhe shtetit shqiptar,” thekson Shoqata Antikomuniste të të Përndjekurve Politikë përmes një deklarate të firmosur nga Kryetari i saj, Nebil Çika, duke e konsideruar si përpjekje të hapur për të zhdukur provat e krimeve të komunizmit në Shqipëri.

“Me keqardhje vëmë re që kësaj iniciative kriminale i janë bashkuar edhe drejtues të komuniteteve fetare, ndoshta të pa informuar për qëllimin e autorëve të sajë. Në këto kushte i bëjmë thirrje drejtuesve të fesë, politikës, shoqërisë civile, medias të mos bëhen pjesë e kësaj maskarade të vazhdimësisë së krimit komunist në Shqipëri,” thekson Nebil Çika duke shtuar se të drejtën për të vendosur çfarë do të bëhet me eshtrat e të zhdukurve e kemi ne familjarët e tyre, jo sharlatanët e organizatave kriminale të masave të PPSH dhe spiunët e Sigurimit të Shtetit.

Deklaratë

Ne Shoqata Antikomuniste e të Përndjekurve Politikë të Shqipërisë protestojmë ndaj përpjekjeve të individëve që i kanë shërbyer diktaturës komuniste dhe organizmave të krijuar prej tyre për të penguar e sabotuar realizimin e një prej të drejtave e kërkesave tona kryesore, gjetjen e trupave të të zhdukurve nga diktatura komuniste.

Ka kohë që po synohet ndërtimi i një varreze false (pa eshtra) të të zhdukurve nga diktatura komuniste, të pushkatuar, të vrarë në kufi, të vdekur nga torturat në hetuesi e burgje, trupat e të cilëve nuk iu janë dhënë familjarëve. Qëllimi është që të sabotohet e të pengohet procesi i gjetjes së tyre, një detyrim ligjor kombëtar dhe ndërkombëtar i qeverisë dhe shtetit shqiptar.

Kjo është një përpjekje e hapur për të zhdukur provat e krimeve të komunizmit në Shqipëri, pasi dihet parimi universal juridik që pa trup nuk ka krim. Në bazë të ligjit, për çdo trup të gjetur prokuroria është e detyruar të nisë hetimet, gjë që do të çojë në zbulimin e shkakut të vdekjes dhe autorëve të tyre.

Kjo ka qenë arsyeja pse qeveria e shteti në konflikt interesi kanë bllokuar deri tani procesin e gjetjes së eshtrave të familjarëve tanë të zhdukur nga komunistët.

Me përpjekjen tonë të vazhdueshme, gjetja e të zhdukurve ka marrë përmasa ndërkombëtare. Aktualisht në Shqipëri po vepron ICMP (organizata ndërkombëtar e gjetjes së të zhdukurve) ndërkohë që në progres raportin e BE për Shqipërinë kjo është shtuar si çështje që duhet te zgjidhet.

Të vënë në presion kombëtar dhe ndërkombëtar, individë e organizma në konflikt interesi me gjetjen e të zhdukurve, kanë gjetur si zgjidhje artificiale kriminale si ky propozim, për ngritjen e një varreze false që do të përdoret si justifikim, brenda e jashtë vendit, për ndalimin dhe sabotimin e gjetjes së eshtrave të njerëzve tanë të zhdukur.

Fakti që këto propozime vejnë e mbështeten nga individë që nuk kanë asnjë lidhje gjaku me të zhdukurit, e për me tepër i kanë shërbyer drejtpërdrejtë diktaturës komuniste, i bën edhe më kriminale këto përpjekje kundër një të drejte legjitime tonën për të pasur një varr për të nderuar e lutur për njerëzit tanë të zhdukur nga komunistët.

Ne dënojmë me neveri përpjekjet e tilla kriminale që i konsiderojmë  vazhdimësi të vrasjeve e zhdukjes së njerëzve tanë nga komunistet .

Me keqardhje vëmë re që kësaj iniciative kriminale i janë bashkuar edhe drejtues të komuniteteve fetare, ndoshta të pa informuar për qëllimin e autorëve të sajë. Në këto kushte i bëjmë thirrje drejtuesve të fesë, politikës, shoqërisë civile, medias të mos bëhen pjesë e kësaj maskarade të vazhdimësisë së krimit komunist në Shqipëri.

Të drejtën për të vendosur çfarë do të bëhet me eshtrat e të zhdukurve e kemi ne familjarët e tyre, jo sharlatanët e organizatave kriminale të masave të PPSH dhe spiunët e Sigurimit të Shtetit. Ne jemi të vendosur të gjejmë trupat e të nderojmë familjarët tanë të zhdukur nga komunistët dhe nuk do lejojmë ata dhe këdo që do të pengojë e të sabotojë këtë të drejtë tonën, ligjore e hyjnore.

Kryetari

Nebil Çika