Krimi në Bllok/ Zbulohet autori i vrasjes, efektivi i komandos në kërkim…

“Është qëlluar jo më shumë se 10 herë nga një pistoletë me 19 fishekë, është një dorë e stërvitur mirë, qitës që e ka instikt të perfeksionuar të shtënën me armë, ushtrim tipik për forcat speciale si të policisë ashtu edhe të komandove, dje ai ishte në shërbim, sot në kërkim, nuk është kapur ende”, tha Artan Hoxha për Report Tv.

“Pjesëtari i komandos sa ka hyrë në lokal është sulmuar nga Gaxha por komandoja ka reaguar menjëherë, ka neutralizuar Fabiol Gaxhën pastaj ka qëlluar Ervis Martinajn që ishte në këmbë në banakun e lokalit.

Grupi i Ervis Martinajt ka hyrë në lokal  u është servirur shishe verë, gotat janë gjetur të paprekura, Martini ishte në banak, kanë hyrë 4 persona mes të cilëve edhe pjestari i komandos, ka patur një shkëmbim batutash pastaj një tentativë të viktimës për të goditur pjesëtarin e forcave komando, ky i fundit, ka reaguar menjëherë, ” ka saktësuar Hoxha.

Ndërkohë Policia e Tiranës në informacionin zyrtar rreth ngjarjen në zonën e Bllokut, në lokalin Monopol ku mbeti i vdekur një person dhe u plagosën dy të tjerë, pas një sherri që mendohet se ka nisur për këngëtaren Elvana Gjata, thekson se viktima është Fabiol Gaxha, 28 vjeç, ndërsa dy të plagosurit janë Ervis Martinaj 36 vjeç, banues në Tiranë dhe Eljon Hato,  28 vjeç, banues në Shkodër.

Ndërkaq janë shpallur në kërkim 3 persona, mes të cilëve i dashuri biznesmen i Elvana Gjatës, Ervin Mata 31 vjeç, banues në Tiranë. Dy të tjerët e shpallur në kërkim janë Fabio Allushi,  42 vjeç, banues në Tiranë dhe Merviol Bilo, 41 vjeç, banues në Tiranë.

Njoftimi zyrtar i Policisë së Tiranës:

Zbardhet ngjarja e ndodhur mbrëmjen e djeshme ku në një lokal në rrugën ‘Ibrahim Rugova’, u plagosën me armë zjarri shtetasit E. M., 36 vjeç dhe E. H., 28 vjeç, si dhe mbeti i vrarë shtetasi F. G., 28 vjeç.

Arrestohen në flagrancë dy të plagosurit dhe shpallen në kërkim tre të tjerë.

Sekuestrohen në cilësinë e provës materiale armë zjarri ‘Glock’, gëzhoja, shumë në euro, automjete e aparate celular.

Grupi i posaçëm hetimor i përbërë nga Specialistë të Taks Forcës Qendrore, Specialistë të Policisë së Shtetit, Specialistë të Hetimit të Krimeve ndaj jetës dhe pronës në Drejtorinë Vendore të Policisë Tiranë, nën drejtimin e një grupi Prokurorësh të Prokurorisë së Rrethit Gjyqësor Tiranë, bënë arrestimin në flagrancë të shtetasve :

– Eljon Hato, 28 vjeç, banues në Shkodër

– E. M., 36 vjeç, banues në Tiranë

Si dhe u shpallën në kërkim shtetasit :

– E. M., 31 vjeç, banues në Tiranë

– F. A., 42 vjeç, banues në Tiranë

– M. B., 41 vjeç, banues në Tiranë

Këta shtetas mbrëmjen e djeshme në rrugën ‘Ibrahim Rugova’, janë konfliktuar në ambientet e brendshme të një lokali duke qëlluar me armë zjarri në drejtim të njëri – tjetrit, ku si pasojë e të shtënave mbeti i vrarë shtetasi F. G., dhe u plagosën shtetasit E. M., dhe E. H., të cilët ndodhen në spital nën kujdesin e mjekëve.

Janë sekuestruar në cilësinë e provës materiale :

– armë zjarri tip ‘Glock’

– 11 gëzhoja

– 10 000 euro

– tre automjete

– aparate celular

Materialet iu referuan për veprime të mëtejshme Prokurorisë së Rrethit Gjyqësor Tiranë në ngarkim të shtetasve të lartpërmendur për veprat penale ‘Vrasje në rrethana të tjera cilësuese, kundër dy ose më shumë personave e kryer në bashkëpunim’ dhe ‘Prodhim dhe mbajtja pa leje e armëve dhe e municionit luftarak’, të parashikuar nga nenet 79/dh-25, 278 të Kodit Penal.