Kriza e çmimeve fillon të ndikojë kursimet e individëve dhe bizneseve

Depozitat shënuan rënie në shkurt. Sipas statistikave të Bankës së Shqipërisë, stoku i depozitave ra me rreth 5.4 miliardë lekë, ose 0.43% më pak në krahasim me muajin e mëparshëm.

Në total, në banka ka 1.23 miliardë lekë kursime, ose gati 10 miliardë euro.

Rënia e kursimeve në shkurt është një sinjal indirekt se rritja e lartë e çmimeve po ndikon në aftësinë e individëve për të kursyer.

Në shkurt, inflacioni arriti në 3.9%, niveli më i lartë në një dekadë, ndërsa Banka e Shqipërisë parashikon që këtë vit ky tregues do të luhatet në rreth 5-6%.

Rritja e lartë e çmimeve, që nuk po ndiqet me të njëjtat ritme nga pagat, bën që qytetarët të kenë më pak aftësi për të vënë para mënjanë.

Edhe bizneset, që po përballen me shpenzime më të larta për shkak të rritjes së kostove dhe shumave më të mëdha që duhen për të importuar të njëjtat produkte, po përdorin likuiditetet e tyre për të përballuar këtë situatë.

Sipas të dhënave të Bankës së Shqipërisë, rënia është ndikuar si nga tkurrja e kursimeve të individëve, kryesisht ato me afat, ashtu dhe të korporatave të tjera jo financiare. Depozitat në lekë shënuan rënien më të madhe, me -0.9%, ndërsa ato në euro u tkurrën fare lehtë.

Me bazë vjetore, ritmi i rritjes së depozitave është pozitiv, me një zgjerim prej 10%, e ndikuar në pjesën më të madhe nga shtimi i kursimeve në monedhën e përbashkët.

Preferenca e kursimtarëve drejt euros ka bërë që të rritet vazhdimisht pesha e depozitave në monedhë të huaj. Në fund të muajit shkurt, kursimet në lekë përbënin 44.5% të totalit, nga 46.2% që ishte pesha e tyre në të njëjtin muaj të një viti më parë./Monitor/