Kriza energjetike, Edi Rama: Me ndihmën e Zotit… 

Kryeministri Edi Rama tha se prioritetet e qeverisë nuk do preken nga kriza energjetike për momentin, ndërsa mbështetet në ndihmën e Zotit për shkak të situatës globale. Duam patjetër që ta mbajmë çmimin e energjisë këtu, tha Rama por edhe kjo do ketë një kufi që do ta vendosin zhvillimet e mëtejshme.

Sa i përket rritjes së çmimit të naftës, Kryeministri Rama e bëri të qartë sot se nuk mund të bëhet asgjë për ulje apo për heqje takash sepse edhe çmimi i energjisë po mbahet “me dhëmbë” i pandryshuar!

“Është herët për të folur për këtë. Për momentin nuk kemi asnjë mendim, ide që të shkojmë drejt këputjeve, shkurtimeve të atyre që kemi përcaktuar si prioritete. Rritja e pagës minimale patjetër, zerimi i taksës mbi rrogën deri në 400 mijë lekë patjetër. Përgjysmimi i taksës mbi rrogën deri në 500 mijë lekë, ose 50 mijë lekë të reja patjetër. Mbajtja e biznesit të vogël me zero taksë mbi fitimin, zero TVSH deri në 100 mln xhiro patjetër. Rritja e pagave për mësuesit, për mjekët, ushtarakët dhe të gjitha ato nënkategori siç është përcaktuar patjetër, investimet patjetër.

Por të gjitha këto me ndihmën e Zotit tani! Sepse çfarë sjell ora nuk sjell viti këtu në këtë botë ku jemi dhe do shohim si do vazhdojë. Duam patjetër që ta mbajmë çmimin e energjisë këtu, por edhe kjo do ketë një kufi. Kufirin do ta vendosin zhvillimet e mëtejshme,” tha Edi Rama duke shtuar se kemi zgjedhur t’i përkasim një fronti shtetesh, vendesh, popujsh, ku jeta e sjell që në ditë të këqija na duhet të bëjmë sakrifica dhe nuk kemi zgjedhur të jemi një shtet neutral, një komb neutral, një vend neutral.

“Me plotë të drejtë jemi pozicionuar aty ku duhet për interesat tona strategjike. Kjo vjen me kosto. Sot ne jemi pjesë e një fronti lufte, jo me armë, dhëntë Zoti asnjëherë jo, por me të gjitha këto që flasim. Ukraina nuk është solidaritet me njerëz, me një popull në një hall shumë të madh. Solidariteti me Ukrainën është vetëmbrojtje e pastër për të mos lejuar që ajo që ndodh atje të mos ndodhë këtu dhe të infektojë gjithë botën tonë. Këto janë sakrificat e luftës.

Është një luftë që nuk mund t’ia lëmë televizorit, se na ka ardhur në shtëpi. Na ka ardhur tek mallrat, tek pompa e naftës, tek faturat e energjisë. Tek faturat nuk lexohet tek familjarët dhe tek biznesi i vogël sepse po e mban qeveria në kurriz. Kjo është më e madhja nga të gjitha. Kjo është për të gjithë ata që thonë ne nuk e kemi mendjen tek njerëzit. Shpresojmë që jemi në gjendje ta mbajmë deri në fund, por varet se kur është fundi,” sqaroi Kryeministri

Për shkak të luftës në Ukrainë, Kryeministri Edi Rama paralajmëroi periudhë shumë të vështirë në vend, ndërsa për çmimin e naftës ai tha se lëviz në çdo moment, madj emund të ketë ndryshuar edhe gjatë kohës që po mbahej konferenca.

“Keni miq të afërt në Itali, Greqi, pyetini se çfarë jete po bëjnë sot që flasim me gazin, me faturën e energjisë elektrike. Pyetini sa ju ka vajtur. Problemi është që ne kemi hyrë në treg si ekonomi tregu dhe nafta, energjia, apo të tjera, blihen në tregun e lirë, që nuk pyet sa e ke rrogën, çmimi është i njëjti. E përsëris edhe njëherë, sot prapë jemi mirë, se ka dhe më keq. Përfaqësuesi i qeverisë ruse dje kërcënoi se Evropa duhet të përgatitet për 300 dollarë fuçia e naftës. Kjo është më shumë se dyfishimi i çmimit aktual, i cili është një çmim marramendës në raport me ku ishim. Lëviz cdo minutë çmimi, ishim 127 kur nisëm konferencën, tani nuk e di sa mund të jemi.

Këtu problemi më i madh që është përpara nesh nuk është çmimi, është mungesa. Lufta dhe gjithë kjo shtresë e luftës që zhvillohet në fushë ekonomike me Rusinë ka mungesën. Flitet sot se kjo krizë e energjisë, që u përqesh kur e paralajmërova unë, mund të zgjaste deri në qershor, pa qenë lufta në mes fare, me çmime që sot janë kapërcyer dhe sot kemi vajtur në 550 euro të një malli që ishte 52 euro në të njëjtën kohë të vitit të shkuar, dhe flitet për 1 mijë, dhe problemi është që nuk do të ketë energji.”

Sot që flasim është i njëjti problem që ndihet, nuk ka në tregun evropian, tha Rama duke shtuar se problemi i mungesës është kryesori.

“Kur flasim për një plan kursimi, jemi në kushtet, kur jemi realistë. Është luftë mo. Unë nuk hyj tek ata që thonë se është fillimi i Luftës së III Botërore, por fakti që kjo thuhet nga njerëz me peshë, do me thënë se jemi në një luftë shumë me impakt, se nga çdo gjë tjetër që kemi parë deri më sot në jetën tonë. Ne duhet të përgatitemi për një periudhë shumë të vështirë. Fatmirësisht po dalim nga periudha e dimrit, dhe tani na duhet më pak, por po dimrin e ardhshëm? Çfarë ndodh dimrin e ardhshëm, do ngremë duart lart? Duhet të jemi shumë realistë. Sot jemi jashtëzakonisht qetë, në raport me çfarë mund të ndodhë. Jemi shumë të shqetësuar në raport me çfarë ishim para 10 ditësh. Agresioni ushtarak e shpërtheu fare kutinë,” tha Kryeministri duke shtuar se kjo është një kuti e re, brenda së cilës duhet të adoptohemi ndërsa për uljen e çmimit të naftës apo heqje taksash ai u shpreh qartë se nuk mund të bëhet asgjë, pasi edhe çmimi i energjisë po mbahet me dhëmbë i pandryshuar.

“Këto 12 ditë është kthyer bota përmbys, jemi në kushte lufte. Lufta për fat të mirë nuk zhvillohet fizikisht këtu, bombat nuk janë mbi kokat tona, familjet tona nuk po ndahen si ato në Ukrainë, por impakti i asaj që po ndodh atje është qartësisht i prekshëm këtu në ekonominë e vendit dhe detyrimi jonë është të garantojmë vazhdimësinë me sa më pak dhimbje, por pa dhimbje luftë nuk ka, të jemi shumë të qartë. Nuk është as vullneti ynë, nuk është as në mundësitë tona që ta shmangim, duhet ta përballim dhe duhet të kemi bindjen se siç ja dolëm në përballjet e tjera, do ia dalim edhe në këtë. Kjo është më e keqja se tërmeti e pandemia, pro duhet të kemi shumë vendosmëri e besim dhe me siguri do ja dalim.,”tha Kryeministri Edi Rama duke përfunduar:

“Na kërkojnë të ulim çmimin e naftës, madje ka dhe propozime absurde për heqjen e taksave. Kjo qeveri ka bërë atë që nuk e ka bërë asnjë qeveri, po mban të palëvizur në kushtet e një kërcënimi shumë herë më të lartë se çmimi i naftës, çmimin e energjisë. Kjo kushton çdo ditë shumë. Kjo kosto përballet pikërisht falë kontributeve. Nuk ka më asnjë hapësirë për të hequr taksa, kemi me zero taksë mbi fitimin, me zero TVSH, biznesin e vogël, kemi përgjysmuar taksën mbi pagën 500 mijë lekë të vjetra, kemi ulur pjesën tjetër të sipërme, dhe nuk ka ku lëvizim më nga pikëpamja e heqjeve. Ne jemi në kushte përpjekjeje të vazhdueshme, me dhëmbë po e mbajmë çmimin e energjisë.”