Kriza koronavirusit/ Ursula von der Leyen: Evropa ka nevojë për një Plan Marshall

Në prag të të takimiti të mnistrave të Financave të Eurogroup ku pritet të diskutohet për financat e bllokut gjatë krizës së koronavirusit, Presidentja e Komisionit Evropian, Ursula von der Leyen e pranon se Evropa ka nevojë për një Plan Marshall.

Ajo u ka bërë thirrje vendeve të BE të investojnë miliarda në buxhetin e bllokut për të shmangur pasojat katastrofike ekonomike nga kriza aktuale e koronavirusit.

Në një artikull për gazetën “Welt am Sonntag”, ajo sqaroi se me “Plan Marshall për Evropën” i referohet programit të rimëkëmbjes të vendosur nga SHBA në periudhën 1948-1952 për të ndihmuar ekonomitë e Evropës Perëndimore pas Luftës së Dytë Botërore.

Presidentja e Komisionit Evropian tha se buxheti i BE u pranua nga të gjitha shtetet anëtare si një mjet për të nivelizuar pabarazitë në një frymë solidariteti dhe se ai tani duhet të përshtatet për të përballuar krizën.

“Shumë miliarda që duhen investuar sot për të shmangur një katastrofë më të madhe, do t’i lidhin brezat së bashku,” thekson ajo, duke e quajtur krizën një shans për të përtërirë ndjenjën e bashkësisë midis kombeve të Evropës.

Thirrja për një Plan Marshall në BE ka ardhur disa javë më parë edhe nga Kryeministri i Spanjës, Pedro Sanchez, i cili edhe sot e përsëriti një thirrje të ngjashme në një editorial për një gazetë tjetër gjermane, “Frankfurter Allgemeine Zeitung”, duke i kërkuar Evropës që të fillojë masa të menjëhershme ekonomike sikur të angazhohen në një luftë.

“Evropa duhet të krijojë një ekonomi të kohës së luftës dhe të vendosë masa për mbrojtjen, rindërtimin dhe rimëkëmbjen ekonomike,” shprehet Sanchez, duke shtuar se kjo duhet të bëhet sa më shpejt të jetë e mundur për të kompensuar borxhet që shumë vende ishin akumuluar gjatë pandemia koronavirus.

“Nëse virusi nuk njeh kufij, as mekanizmat e financimit nuk duhet t’i njohin,” thekson Sanchez, i bindur se një veprim vendimtar, ambicioz mund ta shndërrojë krizën në një “shans për rindërtimin e një Bashkimi Evropian shumë më të fortë”.

Bashkimi Europian aktualisht është zënë në debat se si të merret me barrën e borxhit midis vendeve të saj anëtare. Të martën, Ministrat e financave të Eurogroupit pritet të diskutojnë për financat e bllokut gjatë krizës së koronavirusit.