Kriza Politika/ Zgjidhja, Ilir Meta: Në 13 Tetor, dy palë zgjedhje – të Përgjithshme dhe…

Deri më sot Ilir Meta nuk e kishte marrë seriozisht Edi Ramën dhe nismën e tij për shkarkim por sot foli ndryshe, madje tregoi në detaje karrierën kriminale të Kryeministrit ndërsa për krizën në të cilën ndodhet Shqipëria propozoi një zgjidhje të çuditshme.

Ndonëse ka dekretuar më 13 Tetor zgjedhjet vendore, ai si zgjidhje të krizës propozon që më 13 Tetor  të ketë zgjedhje të përgjithshme dhe presidenciale.

Fillimisht, pas përfundimit të procesit zgjedhor të 30 Qershorit përshëndeti të gjithë shqiptarët që nuk ranë pre e kurthit, siç e vlerësoi ai këtë proces zgjedhor

“Është komplot, që bazohet jo në parimet e demokracisë, as të vlerave të BE, e as të NATO që siç tha sekretari i përgjithshëm ka në zemër demokracinë. Por bazohet në parimet që synon kapjen totale të shtetit.

Fenomen i rrezikshëm i shtetit paralel dhe agjenda të nëndheshme që janë komplot kundër shqiptarëve që duan demokraci evropiane dhe perëndimore.

Prej kohësh i kam bërë të qartë zotit Basha, Kryemadhit dhe mikut tim Doktorit, që të jeni të kujdesshëm të mos bien pre e provokimeve të një grupi të strukturuar PPP dhe një d e vogël.

Kanë gjetur dhe njeriun e duhur për këtë çështje që nuk vjen në takim me Presidentin por lahet në pishinë.

Ilir Meta foli edhe për rrugëdaljen përveç se konstatoi krizën:

“Për mua demokracia është e panegociueshme, me asnjë ambasadë, asnjë shtete, edhe më gjithë botën.

Nëse jam këtu ku jam, ka 30 vjet që populli shqiptar më ka zgjedhur dhe më ka kërkuar të jap dorëheqje për zgjidhje krizash, jam falë demokracisë. Ndryshe do të isha një emigrant, ndoshta i suksesshëm.

Zgjedhjet janë në 13 tetor, dekretin e Presidentit vetëm gjykata Kushtetuese mund ta diskutojë. Pallavrat e PS, KQZ-rat, nuk mund ta verë askush në diskutim. Vendi kërkon zgjidhje, unë kam dhënë vazhdimisht, prapë jap zgjidhjen time në interes të shqiptarëve që duan të ushtrojnë të drejtën për të zgjedhur.

Ata nuk patën mundësi të zgjidhnin, përgjegjësi e të dy palëve, dhe disa të tjerëve që u përfshirë në këtë lojë shqiptare, kundër parimeve evropiane.

Në 13 tetor edhe zgjedhje të përgjithshme edhe për Presidentin. Dhe unë do garoj për president, dhe Rama dhe socialistët të vënë kandidat kë të dëshirojnë, dhe kjo e zgjidh këtë krizë, që të mos na futen prapë nesër në ambasada se është dhe 2 korriku sot.”

Çfarë do të ndodhë nëse Edi Rama nuk e pranon këtë zgjidhje?! Për këtë situatë Ilir Meta shprehet:

“Po do thellohet me tej, ta zgjidhë si të dojë, krizën e ka ai dhe ata, duan një junte që do të asgjësojë çdo institucion, që do ta nxjerrë vendin nga rruga evropiane dhe çelja e negociatave. Në fund e di si mund të thotë ai, që fajin e ka Meta që më bëri Kryetar Bashkie, unë i papërgjegjshëm isha, të vijë këtu kur të dojë, edhe në takim me prindër, ata që ka me vete ai, ka hallin e eksperimentit.

I pyetur për Marrëdhëniet me SHBA, për të cilat akuzohet nga mediat në shërbim të Edi Ramës, Presidenti Meta sqaron:

“Të kristalta, sinqerta dhe jashtë çdo lloj hije dyshimi sa i takon përputhjes së vendimeve të mia dhe interesave strategjike të SHBA në Shqipëri dhe Ballkan. Kam qenë i qartë, i drejtë dhe votimet i vlerëson ODIH, pastaj çdo shtet të mbajë qëndrimet e tij janë të respektuar, nuk hyj në këto komente dhe qëndrime ambasadash, kemi specialistin, konsullin numër një që shpërndan viza, heq viza, merr viza, merruni me atë.”

Në fund shuan edhe kuriozitetin se kush fshihet pas grupit të strukturuar  “PPP dhe d e vogël’ të cilën e përmendi disa herë: “Njëra P janë politikanët, P-ja tjetër është propaganda, P-ja tjetër policia, rrugët policisë që ndiqen për të shantazhuar politikanë, gazetarë, sipërmarrës  dhe d-ja e vogël janë ca diplomatë që kanë braktisur parimet demokratike, perëndimore.”