Kriza politike në Serbi diskutohet në Parlamentin Evropian
Parlamenti Evropian do të diskutojë situatën në Serbi në një seancë plenare të planifikuar për javën e ardhshme.
Siç u konfirmua për European Western Balkans nga Parlamenti Evropian, “Kriza politike në Serbi” është përfshirë në rendin e ditës të së martës, 11 shkurt.
Seanca plenare e Parlamentit Evropian do të mbahet nga data 10 deri më 13 shkurt në Strasburg. Me iniciativën e disa grupeve parlamentare, kriza politike në Serbi është përfshirë në rendin e ditës së kësaj seance plenare.
Pritet që gjatë seancës, përveç deputetëve të Parlamentit Evropian, të marrin fjalën edhe përfaqësues të Komisionit Evropian dhe Këshillit të Bashkimit Evropian, i cili aktualisht drejtohet nga Polonia.
Ndryshe, disa deputetë të Parlamentit Evropian kanë folur tashmë për situatën në Serbi, por ishin vetëm në fjalime individuale. Kjo është hera e parë që kriza politike në Serbi është përfshirë në rendin e ditës që nga nëntori i vitit 2024, kur nisën protestat për tragjedinë në Novi Sad.
Parlamenti Evropian ka diskutuar edhe më parë për situatën në Serbi dhe rasti që tërhoqi më shumë vëmendje ishte debati për zgjedhjet e mbajtura në dhjetorin e vitit 2023, të cilat ishin një pikë në rendin e ditës të seancës së një viti më parë në Strasburg.
Javën e ardhshme, përveç debatit plenar për Serbinë, në mbledhjen e rregullt të Komisionit Parlamentar të Stabilizim Asociimit pritet takimi i delegacioneve nga Serbia dhe Parlamenti Evropian. Kjo mbledhje pritet të mbahet me 12 dhe 13 shkurt, po ashtu në Strasburg, pasi në nëntor të vitit të kaluar u anulua me kërkesën e delegacionit serb.
